VOV4.Xơ Đăng -  Pơtối tơdroăng hneăng hôp ôh tá tối hdrối, kơxo lơ 6/1, a 10 tôh a Hngêi Kuô̆k hô̆i ƀă 62 Tôh a kong pơlê, mâu kăn teăng mâ Kuô̆k hô̆i tơpui tơno ‘na Luât ‘mâi rơnêu, tơ’nôm mâu troăng dêi luât mơ’no liăn cheăng dêi tơnêi têa, Luât mơ’no liăn cheăng tiô troăng khu tơrŭm tơnêi têa ƀă kuăn pơlê, Luât mơ’no liăn cheăng dêi tơnêi têa, Luât pơcháu ăm khu pêi ki hôm tâ, Luât on tơhrik, Luât khu tê mơdró, Luât xo hnoăng mơhá a tơmeăm ki má môi, Luât tơleăng tơdroăng xôi xivil.

Tơdroăng ‘mâi rơnêu, tơ’nôm mâu troăng dêi 8 luât vâ pro tŭm mâu troăng pơkâ pêi, troăng hơlâ dêi Đảng ƀă teăm tah lôi tơdrêng mâu tơdroăng pá puât, tơvâ tơvân tung tơdroăng ki ai tung nôkố. Kơxê kố, mâu kăn teăng mâ xuân tơpui tơno a tôh ‘na: Troăng hơlâ mơ’no liăn Tơdroăng tơkêa bro mơjiâng troăng ăm rơxế kơtâu têi Peăng kơnhŏng – Peăng hdroh pá mâ hâi lo hneăng hơnăm 2021 – 2025 ƀă Tơdroăng tơkêa bro Pơkâ mơnúa mâu troăng pơkâ pêi, troăng hơlâ ki phá tơ-ê mơnhông mơdêk pơlê kong kân Cần Thơ.

A Sa Ly tơplôu ƀă tơbleăng