VOV4.Xơ Đăng - Kơxê lơ 4/1, tơpui tơno a tôh ‘na tơdroăng tơkêa bro Pơkâ hâi khế xo hnoăng liăn ngân vâ tŏng kum tơdroăng rak tơniăn ƀă mơnhông mơdêk cheăng kâ – rêh ối pơlê pơla, mâu kăn teăng mâ môi tuăn kal tơbleăng troăng hơlâ hâi khế xo hnoăng liăn ngân, vâ pro tơniăn, mơnhông mơdêk mơjiâng tơmeăm tê mơdró; tơniăn tơdroăng rêh ối pơlê pơla. Mơhé ti mê, mâu kăn teăng mâ xuân tối tô tuăn ‘na mâu troăng hơlâ xo hnoăng liăn ngân châ pêi pro kô chiâng ‘’mơdêk tâk’’ liăn, ‘’mơdêk tâk’’ ki kơnâ hngêi trăng, tơnêi tơniú.

Tơdrêng amê, pơkâ thế troăng hơlâ xo hnoăng liăn ngân tơkŭm a mâu kơvâ cheăng kal châ mơhnhôk, ai tơdjâk troh lâp lu. Mâu kăn teăng mâ xuân tối tá hâi ai tơdroăng ki tơdâng pơla troăng hơlâ xo hnoăng liăn ngân ƀă troăng hơlâ liăn ngân tung tơdroăng tơkêa bro Pơkâ vâ tŏng kum Tơdroăng pro tơniăn ƀă mơnhông mơdêk cheăng kâ – rêh ối pơlê pơla.

Tơpui tơno a tôh, pôa Nguyễn Xuân Phúc, Kăn xiâm hnê ngăn tơnêi têa pơkâ thế tơ’nôm khu troăng pêi pro mơdêk ki châ tơƀrê xúa liăn ngân tơnêi têa, tơniăn xo hnoăng liăn ngân tơnêi têa krá tơniăn, mơdêk tơdroăng ki tơdrăng dêi liăn ngân ƀă mơdêk hnoăng pro ăm tơtro dêi tơdroăng xo hnoăng mơhá.

Pôa Nguyễn Trường Giang, Kăn teăng mâ Kuô̆k hô̆i kong pơlê Dak Nông môi tuăn troăng hơlâ tê kơtê, kơdroh mâu hnoăng liăn mơhá, kơxô̆ liăn mơ’no, tung mê ai kơdroh hnoăng mơhá kơlo tơmeăm tâk 2% xúa ăm mâu tơmeăm ki nâp hnoăng mơhá 10%. Laga, kăn teăng mâ pơkâ thế kal séa ngăn mâu ngế ki vâ pêi pro, tơkŭm tung mâu kơvâ ki kal châ mơhnhôk, ai tơdjâk troh lâp lu.

Mâu kăn teăng mâ xuân pơkâ thế drêng Pơkâ châ tơbleăng ăm pêi pro, Chin phuh ƀă mâu khu xiâm, kơvâ cheăng tơkêa, pro mơnhên hnoăng cheăng kal kí, hnoăng vâ tối tơbleăng inhên, krê rêm ngế pôu râng hnoăng cheăng, ki má lối cho hnoăng cheăng dêi ngế ối a ko tung pơkuâ, hnê mơhno ƀă séa ngăn tơdroăng pêi pro troăng hơlâ tŏng kum, tơniăn tro pơkâ, ví pêi pro lối râ troăng hơlâ, tơniăn tơdroăng ki châ tơƀrê ƀă chiâng pêi pro.

Klêi kơ’nâi tơmâng Chin phuh pơchuât hlá mơ-éa pơtroh dêi 3 kơxop hlá mơ-éa pơkâ ƀă 1 kơxop hlá mơ-éa luât a hneăng hôp ôh tá tiah hmâ dêi Kuô̆k hô̆i hneăng má 15, Khu kăn Kuô̆k hô̆i kong pơlê Dak Lak hiăng môi tuăn ƀă mơnhên tối khât mau kơxop hlá mơéa hiăng teăm mơ’no tối tơdroăng ki kal, pêi pro tơdrêng ăm ‘mâi mơnhông ƀă mơdêk cheăng kâ rêh ối pơlê pơla.

Kăn Kuô̆k hô̆i veăng tơpui tối a tíu ki mơ’no a Dak Lak

Mâu kăn xuân veăng tơpui tối ‘na kơxop hlá Pơkâ ‘na troăng hơlâ tài khoă, liăn ngân vâ tŏng kum Tơdroăng ‘mâi mơnhông ƀă mơdêk cheăng kâ rêh ối pơlê pơla. Laga, jâ Lê Thị Thanh Xuân tối ối tô tuăn ‘na mâu tơdroăng ki chêh riân ki châ mơ’no tối. ‘Na hâi khế pêi pro mâu troăng hơlâ, jâ Nguyễn Thị Thu Nguyệt, tối tiah kố, drêng pơkâ mơ’no hên hĭn troăng hơlâ kố ki hâi khế pêi pro tung 2 hơnăm cho iâ, mê troăng hơlâ kal châ tối nhên:

“Tơdroăng ki pêi pro môi tiah lâi vâ rak tơniăn tơƀrê khât dêi tơdroăng pơkâ mơ’no mê Chin phuh athế ai mâu tơdroăng ki hriăn ngăn tơmâng tơbleăng tiô túa ki tơdâng tơ’mô ƀă ai troăng hơlâ pơkâ môi tiah lâi? Má 2 nếo, kal rah xo mâu tơdroăng ki châ kơjo kum vâ tối tơbleăng pêi pro ăm mâu troăng hơlâ kố mê nếo rak tơniăn tơdroăng ki pơkâ thế. Tiah mê, pâ thế ki hdrối tâ ƀă tơdjuôm má môi Chin phuh kal tơmâng ngăn ƀă pơkâ mơ’no túa pơkâ, mâu tơdroăng ki xơpá, mâu tơdroăng ki tơvâ tơvân ƀă athế pro tiah lâi vâ tơbleăng pêi pro klêi tung 2 hơnăm.

A sa Ly - Katarina Nga tơplôu ƀă tơbleăng