VOV4.Xơ Đăng -  Klêi kơ’nâi hên xôh tơ’nôm hâi khế, troh nôkố, tơdroăng tah lôi hrĭng hectar hngêi nhĕng mơjiâng ôh tá tro luât a tơnêi kong dêi kong pơlê Lâm Đồng xuân tá hâi châ pêi pro. Tiô séa ngăn, ti tăng plĕng dêi kơ koan cheăng kong pơlê Lâm Đồng, lâp kong pơlê ai lối 227 hectar hngêi nhĕng, hngêi hlâm mơjiâng ôh tá tro luât a tơnêi kong. Tung mê, tơkŭm hên má môi cho a pơlê kong kơdrâm Đà Lạt ƀă vâ chê 185 hectar, pơtối mê cho tơring Lạc Dương lối 21 hectar, Đơn Dương 16 hectar, ki ê a mâu tơring Đức Trọng, Dam Rông ƀă Di Linh.

Lâm Đồng: Hrá ‘nhê tah lôi hrĭng hectar hngêi nhĕng mơdâng ôh tá tro luât a tơnêi kong

Mơhé hdrối mê Vi ƀan kong pơlê Lâm Đồng hiăng ai mơ-éa hnê mơhno mâu tơring, pơlê kong kơdrâm ƀă hên tíu cheăng ki tơdjâk tơkŭm mâu tơdroăng tah lôi klêi đeăng hdrối hâi lơ 30/9/2021, laga troh nôkố, tâi tâng ƀăng deăng hngêi nhĕng hiăng tah lôi bu pá kơdâm 10%. Tiô Khu pơkuâ ‘na pêi chiâk deăng ƀă mơnhông mơdêk thôn pơlê kong pơlê Lâm Đồng, xua chiâng ai tơdroăng hrá kố cho xua mâu tơdroăng pro mơ-éa thế tah lôi pá puât, kuăn pơlê dế pêt tơmeăm tung ƀăng tơnêi mê xua mê pơkâ thế pro ton xŏn vâ pơtâng tối, mơhnhôk kuăn pơlê.

A Sa Ly tơplôu ƀă tơbleăng