Tíu tê mơdró kế tơmeăm tu\m túa ối a tơdế pơlê kong kơdrâm Đà Lạt, ối tung Ko\ng ti tơlo liăn tê mơdró Lâm Đồng, tíu cheăng ki rak vế hnoăng pơkuâ tơku\m po tê mơdró mâu kế tơmeăm ki kal xua khu mơdró kâ Việt Nam mơjiâng pro vâ pro túa pơkâ, klêi mê po rơdâ tê tung lâp kong pơlê. Laga, bu nếo pơxiâm po kơnôm ing mâu kế tơmeăm ki châ tơbleăng tê a tíu kố hên túa kế tơmeăm mê hiăng tơ’mot hên h^n kuăn pơlê tung pơlê kong kơdrâm troh roê [ă tí tăng ‘nâi ple\ng. Nâ Nguyễn Thị Diệu Thúy, ối a bêng 2, pơlê kong kơdrâm Đà Lạt, loi tơngah:

‘’Tâng kế tơmeăm Việt Nam dâi le\m mê á kô roê xúa kế tơmeăm Việt Nam mơjiâng pro yoh. Xua yă tê gá rơpâ, mê pin roê xúa xuân hlo hmiân tuăn, gá le\m dâi’’.

Tiô pôa Bùi Văn Minh, kăn pho\ pơkuâ Ko\ng ti tơlo liăn Tê mơdró Lâm Đồng tối, maluâ mâu kế tơmeăm ki châ tơbleăng tê kố pơrá cho kế tơmeăm Việt Nam la mâu tơdroăng ki mơjiâng pro, roê ‘mot, ki dâi le\m, krúa le\m đi đo cho ki xiâm. Ai tiah mê ‘nôi nếo kum pêi pro châ tơ-[rê tung rôh mơhnhôk ‘’Mơngế Việt Nam kơjo xúa kế tơmeăm Việt Nam mơjiâng pro’’. Pôa Bùi Văn Minh, ăm ‘nâi:

‘’Ngin mơ-eăm pro tiah lâi pêi klêi hnoăng cheăng dêi tơná cho xing xoăng tê mơdró mâu kế tơmeăm ki dâi le\m kố, ai xiâm kối mơjiâng pro nhên vâ kum ăm vâi krâ nho\ng o tung kong pơlê drêng roê xúa loi tơngah. Mơ-eăm pro tiah lâi vâ mâu kế tơmeăm ki nếo, dâi le\m vâ kum kuăn pơlê ki roê xúa kế tơmeăm Việt Nam mơjiâng pro’’.

Châ ‘nâi, tung pơla hdrối kố nah, mâu kơ koan ki ai tơdjâk troh dêi kong pơlê Lâm Đồng xuân hiăng tơku\m po châ 13 roh pơkâ ‘no kế tơmeăm Việt Nam troh a mâu kơpong thôn pơlê, kơpong hơngế hơngo tung kong pơlê. Tơdrêng amê hnối mơdêk hnoăng cheăng mơđah tơbleăng, tơku\m tê mơdró vâ mơdêk mâu kế tơmeăm ki xiâm dêi Lâm Đồng troh a mâu kơchô tê mơdró tung tơnêi têa.

Katarina Nga tơplôu [ă tơbleăng