VOV4.Sêdang - Kơxê lơ 6/8, Khu hnê mơhno hbrâ mơdât pơreăng COVID 19 kong pơlê Lâm Đồng hiăng ai pơkâ thâ pêi pro klâ kơtăn pơlê pơla tiô Pơkâ 16 dêi Ngế pro xiâm hnê ngăn Chin phuh a 2 cheăm dêi pơlê kong kơdrâm Đà Lạt. Pơtối mê, sap ing 19 chôu kơmăng lơ 6/8, 2 cheăm Xuân Trường ƀă Trạm Hành dêi pơlê kong kơdrâm Đà Lạt kô pơxiâm pêi pro klâ kơtăn pơlê pơla tiô pơkâ 16 troh drêng ai tơbleăng nếo.

Tơdroăng séa ngăn, ti tăng mâu ngế ki tro tâ pơreăng dế châ kơ koan cheăng kong pơlê Lâm Đồng thăm pêi pro

Pơkâ klâ kơtăn pơlê pơla a 2 cheăm tơkăng kố châ pêi pro drêng pơreăng COVID 19 xông tâ tú ó. Khu hnê mơhno hbrâ mơdât COVID 19 kong pơlê Lâm Đồng pơcháu ăm Kăn hnê ngăn Vi ƀan pơlê kong kơdrâm Đà Lạt tơkŭm po pêi pro. Tơdjâk troh pơreăng ki nếo, kong pơlê Lâm Đồng hiăng tơbleăng thâ ti tăng ngế ai mâ a mâu tíu tơ’lêi. Tung mê, pakĭng mâu tíu ối tung 2 cheăm Trạm Hành ƀă Xuân Trường, ối ai mâu tíu ki ê a mâu bêng 1,2,4,9,10 tung pơlê kong kơdrâm Đà Lạt.

Nôkố, tơdroăng ti tăng mâu ngế tro tâ, kâng kơxái mơdât ôh tá ăm mot lo kơpong mơdât pơreăng, ví tâ tú tung pơlê pơla dế châ mâu tíu cheăng thăm pêi pro.

A Sa Ly tơplôu ƀă tơbleăng