VOV4.Sêdang - Ƀlêi trâng hâi lơ 2 troh lơ 5/8/1964 cho tơdroăng ki hâk tơngăm dêi mâu rơxông kăn ƀô̆, lêng Quân chủng Hải quân. Cho tíu pêi cheăng ki veăng tung ƀlêi trâng kơtăn kố 57 hơnăm, mâu rơxông kăn ƀô̆, lêng Lưh đoân 170 Kơpong 1 Hải quân hiăng chiu pá, tơbrêi, tơrŭm mơjiâng lưh đoân ôh tá la lâi pơtê ki kân rơdêi chiâng khu lêng ki xiâm rak vế hnoăng pơkuâ chuăn rơlố têa kơxĭ peăng Kơnhŏng dêi Tơnêi têa.

Mâu hâi kố, mơhé kong prâi tro tơdjâk xua kong tô khăng khoăng ƀă pơreăng COVID 19 xông tâ tú ó, kăn ƀô̆, mâu lêng gak kring têa kơxĭ 135, Lưh đoân 170 xuân kơhnâ pơtâp ƀai rơtế tơplâ a kơno. Pro đông a kong pơlê Quảng Ninh, Lưh đoân 170, rế pêi pro hnoăng cheăng, rế hbrâ mơdât pơreăng, rế rak tŭm khu lêng, tơmeăm, tuk hbrâ rơnáu tơplâ. Tâi tâng kăn ƀô̆, mâu lêng dêi Lưh đoân xuân pêi pro kơtăng mâu troăng hbrâ mơdât pơreăng, ki má lối pơkâ ‘’5K’’ 5 thế pêi pro dêi Khu xiâm ngăn pơkeăng ƀă khăm pơlât.

Pakĭng tơdroăng hbrâ tŭm pơkeăng xếo kŏng kơdê pơreăng, xôh pơkeăng, pâng rơkong môh ƀă khăm ki tô tung châ đi đo, ngin hnê mơhno mâu kơ koan, đông lêng pá kơdâm xing xoăng khu, xing xoăng kăn ƀô̆, mâu lêng chiâng mâu tôh, khu kŭn vâ tơniăn klâ kơtăn drêng pơtâp lêng. Ing khu lêng têa kơxĭ kố, hên roh tuk dêi Lưh đoân 170 lăm pêi cheăng, pêi pro ƀlêi trâng rêm hnoăng cheăng châ pơcháu. Mơnhông tơdroăng pêi cheăng tiô khôi túa mâu rơxông pôa pâ prôk hdrối nah, khu kăn ƀô̆, mâu lêng dêi Lưh đoân hâi kố đi đo pơtâp, mơdêk hiâm mơno ‘na kal kí; pơtối thăm pơtâp vâ mơdêk ki rơkê tung tơplâ ƀă ai ivá tơplâ rơkê’’, mê cho tơmiât dêi tâi tâng kăn ƀô̆, mâu lêng têa kơxĭ 135, Lưh đoân 170.

Pĕng kanŏng tơplâ 53 –VA hơnăm 2019 a Lưh đoân 170

Thươ̆ng ŭi Trần Văn Cảnh, kăn pơkuâ kơvâ răng ƀom tuk 354, khu lêng têa kơxĭ 135 tối ăm ‘nâi: Mâu tơdroăng hriâm ki rơkê, mâu khôi túa ki kơnâ dêi pôa pâ nah cho mâu tơdroăng vâ hnê hriâm tung mâu chôu tơkŭm hôp dêi tuk vâ pơchân mâu kăn ƀô̆, mâu lêng thế đi đo mơdêk tuăn ngôa rơkê, tuăn tơmiât vâ pêi kêi đeăng tŭm hnoăng cheăng mơhé drêng lâi.

“Cho rơxông ối nếo châ rêh ối tung hơniâp lĕm ƀă châ pơxúa mâu tơdroăng ki pleăng hnoăng cheăng, hnoăng kân kĭn dêi mâu rơxông pôa pâ prôk hdrối, ki rơhêng châ pêi cheăng a lưh đoân ai mâu tuk cho khu ki apoăng tơplâ ƀlêi trâng dêi khu lêng têa kơxĭ kuăn pơlê Việt Nam, á tâ phiu ro ƀă xuân hlo hnoăng cheăng dêi tơná’’.

Thiê̆u tă Phạm Tố Chinh, cheăng kal kí khu lêng têa kơxĭ 135 tối ăm ‘nâi: mâu tơdroăng hriâm tiô khôi vâi krâ nah tung roh tơplâ apoăng hâi lơ 2 ƀă lơ 5/8/1964 hiăng mơhnhôk, pro tơdroăng loi tơngah ƀă mơjiâng tơdroăng ki khŏm mơ-eăm ăm kăn ƀô̆, mâu lêng têa kơxĭ hâi kố hbrâ rơnáu vâ pleăng dêi hnoăng cheăng vâ gak kring hnoăng pơkuâ têa kơxĭ, rơlố dêi Tơnêi têa.

“Vâ mơnhông tuăn ngôa rơkê xuân môi tiah ivá dêi mâu kăn ƀô̆ mâu lêng ahdrối cho hnê hriâm troăng tơmiât, hlê plĕng trâu hơngế ‘na tơdroăng hnoăng cheăng, mâu tơdroăng pá puât tung pêi pro hnoăng cheăng, ing mê mơnhên tơtro hnoăng cheăng châ pơcháu, pro tơ’lêi hlâu má môi vâ mâu lêng mơnhông tâi tâng ivá tơná, mơnhông hiâm mơno ki chiâng pêi xêh, hriâm tâp ƀă ki rơhêng vâ tối tung hriâm tâp tơplâ, hbrâ rơnáu vâ tơplâ xuân môi tiah hriâm tâp a đông lêng, hnê dêi pó túa ki rơkê tơtro dêi rơxông pôa pâ prôk hdrối mơnhông hiấm mơno pôu râng hnoăng cheăng dêi tơná’’.

Mâu hơnăm achê pơla kố, tung ƀiên chê̆ tơkŭm po dêi Khu lêng têa kơxĭ 135 ai tơ’nôm hên tuk krâ kơmăi kơmok rơxông nếo. Trâu hơngế lăm séa ngăn tơdroăng pơtâp, hbrâ rơnáu tơplâ ƀă tơniăn kih thuât, cho tơdroăng pêi đi đo dêi khu kăn pơkuâ, hnê mơhno mâu râ a Lưh đoân 170, vâ tơmiât pêi pơkâ ki kân má môi: kuăn mơngế ƀă pháu hnêa kih thuât đi đo hbrâ rơnáu kêi đeăng hnoăng cheăng châ pơcháu.

Kăn ƀô̆ mâu lêng Lưh đoân 170 kơpong 1 khu lêng têa kơxĭ pơkuâ hâi kih thuât

Thươ̆ng tă Tô Hồng Quân, Chính ŭi Lưh đoân 170, Kơpong 1 Khu lêng têa kơxĭ tối: kăn ƀô̆ mâu lêng Lưh đoân 170 ngoh khên tơnôu đi đo djâ tung châ tơná tuăn ki khŏm mơ-eăm krá tơniăn gak kring hnoăng pơkuâ krih tơviah dêi Tơnêi têa.

“Hriâm tâp, pêi cheăng a đông pêng păm khôi túa mô đô̆i xuân phiu ro, lưh đoân xuân thăm pêi pro ăm mô đô̆i chiâng xúa kơmăi kơmok, mơdêk hiâm mơno tơkâ hluâ pá puât, mơjiâng hiâm mơno kal kí krá tơniăn’’.

Ing ƀlêi trâng tơplâ roh tơplâ apoăng nah, mâu rơxông kăn ƀô̆ mâu lêng hâi kố hiăng ‘’kum hên’’, tơ’nôm ivá ó rơdêi kân kĭn vâ mơjiâng môi Lưh đoân 170 ó rơdêi, tơxâng cho đông lêng khên tơnôu khu lêng kuăn pơlê a tíu apoăng rơlố têa kơxĭ peăng kơnhŏng Tơnêi têa.

VOV1 chêh

A Sa Ly tơplôu ƀă tơbleăng