VOV4.Sêdang - Tung rôh pơreăng COVID-19 rôh má 4 xông tâ, hiăng ai lối hrĭng ngế kăn ƀô̆ pơkeăng lêng lăm tŏng kum ăm mâu kong pơlê ki ai pơreăng peăng Hdroh tơnêi têa. “Tâi pơreăng ah nếo vêh” cho rơkong tối nhên dêi kăn ƀô̆ pơkeăng lêng tung rôh tơplâ mơdât ƀă pơreăng drêng pơxiâm mot tung kơpong ki ai pơreăng. Ngế chêh hlá tơbeăng cheăng tung Rơ’jiu Việt Nam hiăng chêh tối ‘na hiâm mơno lĕm ƀă tơdroăng ki tơmiât dêi mâu kăn ƀô̆, ƀok thái pơkeăng hdrối vâ lăm troh a mâu kong pơlê peăng Hdroh kum ăm hngêi pơkeăng lêng a Pơlê kong kân Hồ Chí Minh.

Ai 100 ngế ƀok thái pơkeăng, mâu ngế pêi cheăng khăm pơlât, mơngế troh ing Hok viê̆n Kuân y, mơngế troh ing Hngêi pơkeăng Kuân y 7, Hngêi pơkeăng Kuân y 103 ƀă Hngêi pơkeăng pơlât ƀă pơkeăng rêi nhâ hlá loăng Mô đô̆i, ing kơxo má hiăng ai mâ a tíu tơkŭm Lưh đoân pơto mơngế, tơmeăm khoăng 971 Sóc Sơn vâ hbrâ prôk troăng. Tâi tâng pơrá môi mơngiơk ếo mơdât pơreăng, môi kơtong ƀa lô tơ’lêi hlâu tâ iâ tơmeăm xui a kơxah, mê cho tâi tâng tơmeăm vâ lăm mơdât pơreăng.

Ahdrối vâ prôk troăng lăm a mâu kong pơlê peăng Hdroh Tơnêi têa pêi hnoăng cheăng, mâu mô đô̆i ƀok thái pơkeăng bu teăm krếo phôn ăm rơpŏng hngêi môi nâ. Xua tơdah pơkâ thế a kơmăng gâ hâi kơ’nâi vâ prôk troăng troh a Pơlê kong kân Hồ Chí Minh, mâu kăn ƀô̆ mô đô̆i bu teăm hbrâ tơmeăm ki vâ pêi cheăng, ôh tá teăm lăm dêi a hngêi. Thăm nếo ngế kơdrâi thiê̆u tă Nguyễn Thị Kiên – Hngêi pơkeăng Kuân y 7 tá hâi teăm tối tơbleăng ƀă rơpŏng hngêi.

‘’Kơnốu á mê tá hâi ‘nâi, xua á tơdah pơkâ thế tung kơmăng, á tá hâi teăm tơbleăng, kơnốu á lăm pêi cheăng a hơngế, kơnốu á xuân khu lêng, kơnốu á cho kŏng an’’.

Mâu mô đô̆i ki pro ƀok thái pơkeăng tơdah pơkâ ahdrối chôu vâ prôk troăng

Roh lăm pêi thâ kố mơni cho 15 hâi mơni kô ton tâ mê nếo, ôh tá ai kơbố kơ-êng hâi ki vêh, xua kơxô̆ mơngế tro tâ pơreăng xuân tâk hên, ƀă khu pú ki prôk hdrối xuân dế ối pơlât mâu ngế tro tâ pơreăng tung mâu hngêi pơkeăng pơtân hên măng tĭng ƀă pêi cheăng trâm hên pá puât, laga kơbố xuân mơ-eăm pêi cheăng vâ troh tah pơreăng. Ƀă vâi plĕng drêng hiăng xâp tung châ 2 mơngiơk ếo mô đô̆i, ƀok thái pơkeăng mê drêng pá puât rơ-iô xua pơreăng, thăm tâ mê nếo cho drêng kuăn pơlê kal, tơnêi kal troh vâi.

Tung hiâm mơno pói vâ rĕng mot a kơpong ai pơreăng, Đăi ŭi, ƀok thái pơkeăng Đặng Văn Ba, khoa hôi sư̆c nô̆i, Hngêi pơkeăng Kuân y 103, tối:

‘’Châ hlo tung mâu um tơvi, rơ’jíu, măng internet, ƀă mâu nhŏng o khu pú pêi cheăng tung mê tối ăm ‘nâi, kơxô̆ mơngế tro pơreăng F0, ki rơhêng vâ tối cho kơxô̆ mơngế F0 râ hên ‘nâng, ƀă ngin xuân tô tuăn, rơhêng vâ châ mot vâ veăng, vâ kum nhŏng o thái pơkeăng, ƀok thái pơkeăng, kum ăm mâu ngế tro tâ pơreăng pơlât ăm vâi’’.

Mơnhên kố cho hnoăng cheăng tơplâ tung rơxông hơniâp lĕm, tá mâu ngế hriâm ối nếo môi tiah Trung sih Phạm Công Kim, ngế hriâm Hok viê̆n Kuân y xuân vâ pleăng hnoăng cheăng ƀă mơnhên hnoăng cheăng drêng châ thế veăng kum ăm hngêi pơkeăng pơtân a Pơlê kong kân Hồ Chí Minh:

‘’Ngin châ hnê 3 roh, hnê ‘na mâu tơdroăng xo têa hế, têa kơhêa xuân môi tiah khăm ngăn têa kơhêa, têa hế, ngin kô chiâng kum ‘na tơdroăng khăm ngăn ăm tơdroăng hbrâ mơdât pơreăng, ƀă tơdroăng rak ngăn mâu ngế tro tâ pơreăng ngin xuân chiâng pêi’’.

Thiê̆u tă Đỗ Mai Phương, Hngêi pơkeăng kuân y 7 pleăng hnoăng cheăng mot

a Pơlê kong kân Hồ Chí Minh hbrâ mơdât pơreăng

Lôi parŏng cho kơdrâi, cho kơnốu, cho kuăn ‘nĕng, cho nôu pâ hiăng krâ, laga mâu ngế pa rŏng dêi mâu mô đô̆i xuân nhuô̆m, hlê plĕng tơdroăng cheăng dêi mô đô̆i, vâ tá hiâm mơno ăm veăng kum khu mơdât pơreăng dế kal troh kuăn ‘nĕng, nhŏng o vâi. Kơnôm mê mâu mô đô̆i hmiân tuăn, khŏm mơ-eăm prôk troăng mơhé ai hên tơdroăng ki tơvâ tơvân, tô tuăn. Ki má lối cho ƀă mâu rơpŏng tŭm on veăng pơrá pêi cheăng tung khu lêng ƀă pơrá cho khu ki mơdât pơreăng. Điêu yươ̆ng kuân y Nguyễn Thị Kiên tối ăm ‘nâi:

‘’Môi ngế kuăn hriâm lâm 10, môi ngế kuăn hriâm lâm 4 laga nôu pâ đi đo thế pêi cheăng a kơmăng, kơnốu á nôkố dế ối tung kơpong klâ kơtăn, hnoăng cheăng pơkuâ tung kơpong klâ kơtăn xua mê péa ngế kuăn châ pơtâp sap ing ton nah xua mê hiăng hmâ ƀă tơdroăng nôu pâ ôh tá ối a hngêi, xua mê prếi nâ o rak ngăn dêi pó hriâm tâp, rêh ối, ôu kâ’’.

Môi tiah Thiê̆u tă - Ƀok thái pơkeăng Đỗ Mai Phương xuân lôi dêi péa ngế kuăn ối kŭn ối a hngêi rak ngăn dêi pó, ƀă nôu mot a peăng Hdroh tơnêi têa hbrâ mơdât pơreăng mê ôh tá tô tuăn hên klâi ôh.

‘’Péa nâ o ối a hngêi rak ngăn dêi pó, á mơnhên hnoăng cheăng á cho prôk troăng tơdjuôm ivá hbrâ mơdât pơreăng ƀă vâi krâ tung kơpong peăng Hdroh tơnêi têa, mơnhên hnoăng cheăng xua mê ôh tá ai tô tuăn klâi’’.

Mơnhông khôi túa tiô vâi krâ roh nah khŏm tơplâ, khŏm ƀlêi trâng dêi Khu mô đô̆i khên tơnôu, ƀă hiâm mơno tâi tâng xua kuăn pơlê peăng Hdroh tơnêi têa nhŏng o, ƀă tơdroăng pêi ‘’hbrâ mơdât pơreăng môi tiah tơplâ mơdât khu lêng ‘mêi’’, xông tơplâ ó rơdêi tâ, kơtăng tâ, pơkâ thế pin khŏm mơ-eăm hên, hbrâ rơnáu tơdah ƀă kêi đeăng rơkê hnoăng cheăng. Hdrối mê, Khu xiâm pơkuâ mô đô̆i hiăng hnê mơhno kơ koan, đông lêng pêi pro mơjiâng 7 hngêi pơkeăng pơtân tung mâu kong pơlê, pơlê kong kơdrâm peăng Hdroh tơnêi têa ƀă ivá tơdah, pơlât 3.5000 ngế ƀă hbrâ po rơdâ, kâi tơdah troh 10.000 ngế tro tâ pơreăng.

Roh pơ’lâng dêi mâu mô đô̆i xuân phá tơ-ê, ôh tá ai nhŏng o, bu khu pú mô đô̆i rŭp kŏng khu pú drêng hên hĭn mâu ngế tro tâ pơreăng dế tơkôm. Vâi prôk troăng pơtối hrĭng ngế kăn ƀô̆, thái pơkeăng, ƀok thái pơkeăng dế ai mâ a 7 hngêi pơkeăng pơtân xua khu mô đô̆i mơjiâng a kơpong ai pơreăng a mâu kong pơlê peăng Hdroh tơnêi têa, tíu dế pơlât ăm rơpâu ngế tro tâ COVID 19 ƀă khŏm mơ-eăm rak vế châ chăn, ivá ăm kuăn pơlê, xua kơxo ah ôh tá ai pơreăng.

VOV1 rah chêh

A Sa Ly tơplôu ƀă tơbleăng