VOV4.Sêdang - A kơpong tơneăn 790, tíu tê mơdró ƀă lâp plâi tơnêi Bờ Y, tơring  Ngọc Hồi, Khu xiâm pơkuâ Mô đô̆i gak kring tơkăng kong dêi kong pơlê Kon Tum hiăng tơkŭm po diâp ăm tơmeăm kâ, tơmeăm khăm pơlât ăm khu Kŏng an, Khu lêng 2 kong pơlê Attapeau ƀă Sekong, kong têa Lếo. Tâi tâng Khu xiâm pơkuâ Mô đô̆i gak tơkăng kong dêi kong pơlê Kon Tum diâp ăm 2 kong pơlê 13 tâ̆n phái, 80 kơthung xup kơxŏng khăng rơtế ƀă kên pâng rơkong môh hbrâ mơdât pơreăng, hmân ếo hbrâ mơdât pơreăng, têa pơkeăng xếo kŏng kơdê pơreăng ƀă tâi tâng kơnâ 220 rơtuh liăn.

Khu xiâm pơkuâ Mô đô̆i gak tơkăng kong kong pơlê Kon Tum diâp tơmeăm kâ, tơmeăm khăm pơlât ăm khu Kŏng an, Khu lêng 2 kong pơlê Attapeau ƀă Sekong

Teăng mâ khu Kŏng an, Khu lêng 2 kong pơlê Attapeau ƀă Sekong mơnê hên ‘nâng tơdroăng tŏng kum, teăm tơdrêng dêi Khu xiâm pơkuâ Mô đô̆i gak tơkăng kong kong pơlê Kon Tum; tơdrêng amê pơtối mơnê, rak vế khôi túa rŭm môi tuăn ki git kơnía, thăm tơrŭm krá tơniăn tâ mê nếo tung pêi pro hnoăng cheăng gak kring kơpong tơkăng kong ƀă tơplâ mơdât pâk chik, tê mơdró ma tŭi.

A Sa Ly tơplôu ƀă tơbleăng