VOV4.Sêdang - Kơxê lơ 26/7, a Hà Nội, Trung tươ̆ng Lương Tam Quang, kăn xiâm phŏ pơkuâ ngăn Kŏng an tơdah pôa Christopher Klein, Ngế xiâm teăng mâ Mih a Việt Nam. A rôh tơdah, pôa Lương Tam Quang mơnê poâ Christopher Klein ƀă khu kăn teăng mâ Mih a Việt Nam tung pơla hdrối kố nah hiăng ai hên tơdroăng ki veăng kum ai pơxúa, mơdêk tơrŭm cheăng tung la ngiâ pơla Việt Nam – Mih, xuân môi tiah tơrŭm pơla Khu xiâm ngăn Kŏng an Việt Nam ƀă mâu kơ koan tơrŭm cheăng Mih mơnhông tơniăn lĕm, trâu hngế, tơƀrê, ai pơxúa.

Tối tơdroăng loi tơngah tơrŭm cheăng pơla péa tơnêi têa, tung mê ai tơrŭm cheăng pơla kơ koan gak kring, kăn sát péa tơnêi têa kô rế hía rế krá tơniăn; Tối nhên, Khu xiâm ngăn Kŏng an Việt Nam hbrâ rơnáu tơpui tơno, tơrŭm krá ƀă kăn teăng mâ Mih a Việt Nam kum pơxúa tơdjuôm dêi péa tơnêi têa, veăng kum pơkâ tơleăng, kơdroh mâu tơdroăng ki ôh tá môi tuăn tung tơrŭm cheăng pơla péa pâ, ‘mâi mơnhông hiâm mơno loi tơngah tung la ngiâ, ăm tơrŭm cheăng pơla péa pâ rế hía rế trâu hngế, ai pơxúa.

Katarina Nga tơplôu ƀă tơbleăng