Tơkâ luâ hên rôh châ̆m, Khu tơkŭm po hiăng diâp 4 pri Mơhnhôk ƀă 1 pri ối má Môi. Pri ối má Môi cho dêi ngế chêh Hoàng Thị Thu Thảo, a pơlê kong kân Đà Nẵng. Logo châ kơchuâ chêh tiô túa nâl tơpui pro um tiô chal nôkố, xo ing um hngêi trá xŏn cho tơdroăng ki xiâm, cho tơdroăng ki má môi dêi túa lĕm tro Tây Nguyên, tro ƀă tơdroăng rêh kâ ối dêi pơlê pơla, hiâm mơno tơrŭm ƀă túa lĕm tro dêi mâu hdroâng kuăn ngo rêh ối ton hơnăm a kơpong tơnêi Dak Lak.

Um châ rah xo pro Logo ki păng ‘nâng vâ kơnó inâi dêi kong pơlê. A rôh po tơdroăng, kăn pơkuâ kong pơlê Dak Lak hiăng pêi pro tơbleăng Logo ki păng ‘nâng dêi kong pơlê. Cho tơdroăng ki mơhno châ tơngah veăng mơđah tơblăng um méa, túa lĕm tro ƀă tơdroăng púi rơhêng vâ mơnhông dêi kong pơlê tung hneăng ki nếo.