Kơpong Nhơn Lý ai hên tơmeăm vâ pro tíu ôm hyô xua hên tíu, túa ki kơnía túa lĕm tro môi tiah mơdĭng xối xeăng ká Xương Lý, tơnâp pôa Nam Hải rơtế hên tơdroăng tơviah ki ê ‘na mâ ngăn kong ế, kuăn pơlê. Vâ tơbleăng pro tơƀrê kơno tuk ká tơkŭm ƀă ôm hyô, Vi ƀan kong pơlê Gia Lai pơkâ thế mau tíu, kơvâ cheăng tơdjâk troh tơrŭm tăng ngăn, ‘mâi hơ’lêh pơkâ hdró troăng vâ mơnhông tơdjuôm.

Mê cho, Khu xiâm ngăn túa lĕm tro, Tơ’noăng ivá ƀă ôm hyô pơkuâ pâ thế ‘mâi hơ’lêh pơkâ, hlối tơrŭm pro mâu tơmeăm ôm hyô a Nhơn Lý, Nhơn Hải tiô troăng tăng ki pơxúa túa lĕm tro dêi pơlê tơnăng ká ƀă mơdĭng xối xeăng ká dêi kuăn pơlê. Khu xiâm ngăn ‘na chiâk deăng ƀă hyôh kong prâi tăng ngăn tơdroăng pơkâ pro kơno tuk ká, tăng túa pro ki tơkŭm ƀă ôm hyô ton hơnăm, pơkâ thế tơdroăng rak ngăn, tơnăng ká ăm tơtro. Khu xiâm mơjiâng pro kô tăng ngăn tơdroăng pơkâ mơjiâng, tơniăn tơdâng tơmeăm ki mơjiâng.