Pơxiâm po xap hâi lơ 28/8 ƀă ta troh tâi hâi lơ 5/9  Hà Nội, Mơđah tơbleăng Hnoăng hiăng châ pêi pro dêi tơnêi têa 80 hơnăm hâi tăng troăng pêi pro Tơniăn krê-Hlâu hlĕng- Hơniâp ro tơbleăng  hnoăng hiăng châ pêi pro mơnhông tơnêi têa tung hên tơdroăng. Pôa Tạ Quang Đông, Phŏ Ngế xiâm ngăn Túa lĕm tro, Tơ’noăng ivá ƀă Ôm hyô tối nhên:

“Kô cho môi tíu mơhno tơbleăng ki pin châ tơbleăng  hên  ‘na um méa ƀă kuăn mơngế, Tơnêi têa Việt Nam, mâu tơdroăng pơloăng mơnúa dêi Việt Nam ƀă vâi pú tung lâp plâi tơnêi, ƀă kuăn pơlê tung tơnêi têa tung rôh leh tơbâ hâi lơ 2/9 kố.  Kố cho môi tíu tơkŭm, môi tíu troh kô tơ’mot hên kuăn pơlê troh pơlê Kong xiâm mâu kong pơlê, pơlê kong kân troh a kố ngăn mơđah tơbleăng ƀă  ing mê kô tơbleăng troh lâp lu hlo hnoăng ki hiăng châ pêi pro dêi tơnêi têa pin”.

Veăng Tơbleăng ai 34 tíu tơbleăng tơviah lĕm mơnâ mâ, mơhno ki lĕm krê xêh dêi 34 to kong pơlê, pơlê kong kơdrâm, kong kân ƀă mâu khu râ cheăng, khu xiâm kơvâ cheăng xiâm tơnêi têa. Môi tung mâu tíu  ki vâ mơhno ăm hlo hên Mơđah tơbleăng rôh kố cho tíu tơbleăng mâu tơmeăm ‘na lêng, mơhno ki rơdêi  mâu lêng kuăn pơlê Việt Nam. Thiê̆u thươ̆ng Tống Văn Thanh, Phŏ ngế xiâm pơkuâ hnê pơtâp lêng, Khu xiâm kal kí Lêng kuăn pơlê Việt Nam tối:

“A kố ngin xúa mâu tơmeăm kŏng ngê̆ tung tơdroăng mơđah tơbleăng tiô troăng hyôh ƀă tơbleăng tiô túa nếo, malối cho xuân mơhno kơpong ki ăm tơmối troh hyôh ngăn hlo ‘nâi cho cho môi tíu ki tơviah hêng hlo. Má péa cho veăng tơbleăng a kơpong pagong  ƀă pơxá “Cháng ƀă khiâ”  - tơbleăng a tíu tơni ki khu tơkŭm po mơhno ai lối 2ha. A kố ngin mơhno hên tơmeăm  xúa ‘na lêng, hên túa pháo kơnŏng kân, hbrâ tơmeăm ki ó tâ xua mâu đông lêng, khu mơdró tơmeăm ‘na lêng tăng hriê̆n plĕng ƀă mơjiâng pro.”

Tíu xiâm chêh hlá tơbeăng mơđah tơbleăng “Hnoăng hiăng châ pêi pro dêi tơnêi têa 80 hơnăm mơnhông Tơniăn krê- Hlâu hlĕng- Hơniâp to”, pôa Lê Hải Bình, Phŏ  ngế Xiâm ngăn Túa lĕm tro, Tơ’noăng ivá ƀă Ôm hyô ăm ‘nâi:

“Tíu xiâm chêh hlá tơbeăng cho tíu kô tối ăm ‘nâi mâu tơmeăm vâ pơxúa tro má môi ăm mâu ngế chêh hlá tơbeăng tung tơnêi têa ƀă kong têa ê vâ chêh xup um, xuân môi tiah mâu pơkâ ki kal  tung tơdroăng mâu ngế hlá tơbeăng vâ chêh hlá tơbeăng  thâu xo  xup um. Ƀă tơdroăng ki pơxúa tiah mê, ngin kô pro hlâu ăm mâu ngế chêh hlá tơbeăng tung tơnêi têa ƀă kong têa ê  châ chêh tối ‘na Mơđah tơbleăng um tơmeăm xuân môi tiah mâu vâi pú mâu ngế chêh hlá tơbeăng xuân tâ tung hiâm  ‘nâi tơná rĕng châ chêh mâu tơdroăng rôh mơđah tơbleăng um tơmeăm”.

A kố xuân po mâu tơdroăng mơđah hơdruê xuâng, hôp tơpui tơno, ngăn  hlo hên t tơmeăm. Mơđah  tơbleăng mê ôh tá xê to hâi leh kân Kal kí - Túa lĕm tro ki kal mê ối veăng tơbleăng troh lâp lu toăng ki tơrŭm dêi hdroâng mơngế, tơbâ tơdroăng púi vâ mơjiâng tơnêi têa  xông rơdêi. Kố cho tíu ki vâ mơhno nhên ăm hlo tung hên tơdroăng po leh  koh tơbâ Kăch măng khế Tơheăm ƀă hâi mơjiâng Tơnêi têa lơ 2/9.