Tung môi toăng hngêi ki nếo meăn pro kân krip, kơnâ châ 1 rơtal liăn, pôa Dà Cắt Tư hiăng kơtúa môi kơtâ um Pôa Hồ, ƀâng kơdeăn khĕn, hlá kơdeăn khĕn vêh mơnhên hnoăng dêi mâu ngế tung rơpŏng hngêi tung pơla mơhriâm tâp ƀă pêi tơdroăng cheăng. A kơtuh mê, pôa rơnuâ bro hên kế tơmeăm ƀă hlá mơ-éa, ki vâ tối hên má môi, mê cho kơxop hlá mơ-éa chêh tối ‘na khôi túa, vêa vong ƀă túa lĕm tro dêi mơngế M’Nông.

Pôa Dà Cắt Tư hâk mơnâ dêi tâ cho kơxop hlá mơ-eá “Văn hok tơdroăng chal krâ dêi mơngế M’Nông”, cho xua tơná pôa chêh xo, thâo hrik, uân chêh bro a hơnăm 2013, tung mê tơkŭm hên tơdroăng, trối: rơngê ting ting êng tiâ dêi pó, tơngê tơthông pơla vâi droh rơtăm, tơdroăng pơto pơtih, tơdroăng tơpui tơdjếi ƀă hên mâu tơdroăng ki ê. Pôa ai tối:

“Sap ing ối tơxĭn nah, á hiăng lăm mơhrriâm hên tíu. Drêng hiăng xông kân, á hiăng toh chôu lăm mơhriâm hngêi trung Đăi hok a Pơlê kong kân Hồ Chí Minh. Xua mê, á khoh hlê plĕng nhên tâ ‘na ki pơxúa dêi khoi túa, vêa vong dêi hdrông kuăn ngo M’Nông trối: tòng, pơ̆t, ntòng sơh ƀă mâu tơdroăng tơpui tơcho, tơpui tơdjếi dêi hdrông kuăn ngo tơná. Klêi kơ’nâi mơhriâm, á prếo a pơlê, pơxiâm lăm tí tăng chêh xo, thâo hrik mâu rơkong ki tơpui tơdjếi, tơpui tơcho dêi hdrông kuăn ngo tơná, klêi mế, á ‘mâi rơnêu ăm i lĕm, chêh bro chiâng kơxop hlá mơ-éa. Ai môi tơdroăng ki hdró kân ƀă á drêng á lăm troh a Hà Nội ƀă hiăng châ trâm pôa Nguyễn Phú Trọng, Kăn xiâm pơkuâ hnê ngăn Đảng hneăng hdrối. Pôa ai pơchân tối, mâu ngế ki châ kuăn pơlê loi tơngah tung pơlê pơla kal athế po rơdâ lân lĕng hiâm tuăn rak vế bă pơtối chôu vế, pơtối mơdêk khôi túa lĕm tro dêi hdrông kuăn ngo. Ing mê, á thăm rế kơdo mơ-eăm mơdoh chôu phut vâ tí tăng chêh xo, thâo hrik mâu rơkong ki vâi krâ tơpui tơcho, tơpui tơdjếi, pơpơtih dêi hdrông kuăn ngo M’Nông, ƀă tơdroăng pói rơhêng vâ chôu ‘măn ăm rơxông kuăn cháu á la ngiâ”.

Kơdo mơ-eăm ƀă hnoăng cheăng tung chêh xo, thâo hrik ƀă mơnhông mâu ki kơnía dêi khôi túa lĕm tro dêi hdrông kuăn ngo, pôa Dà Cắt Tư hiăng mơjiâng mâu khu tôu chêng a thôn Liêng Trang 1, thôn Dà Nhình 1 ƀă Dà Nhình 2. Dế nôkố, mâu khu tôu chêng kố xuân ối pơtối mơhriâm ƀă lăm mơđah, rế ton rế hnê hên mâu vâi o vâi muăn ki tơxĭn vâ mot tung khu; hên xoh lăm mơđah ƀă mâu cheăm, bêng ki ê tung kong pơlê Lâm Đồng. Ngoh Dà Cắt Ha Tiên, môi ngế tung khu tôu chêng a cheăm Đam Rông 4 ai tối ăm ngin ‘nâi tiah kố:

“Jâ pôa pin hiăng chôu ‘măn ăm khôi túa, vêa vong ki kơnía, xua ti mê, ngin athế kơdo mơ-eăm mơhriâm ƀă rak vế vâ ôh tá pro mơhía lôi khôi túa, vêa vong dêi hdrông kuăn ngo tơná  pin. Khu tôu chêng ngin đi đo lăm tơ’noăng ƀă châ kâ pri ki kân. Ing mê, ngin thăm rế hlê plĕng nhên tâ ki kal dêi tơdroăng pơtối rak vế, pơtối mơnhông khôi túa, vêa vong dêi mâu hdrông kuăn ngo Tây Nguyên, trối M’Nông, K’Ho”.

Vâ veăng gum rak vế ƀă pơtối mơdêk ki kơnía dêi khôi túa lĕm tro mâu hdrông kuăn ngo, pơla hdrối kố nah, khu kăn hnê ngăn hiăng hbru tơ’nôm 2 kơtum chêng ăm mâu kâu lăk ƀô̆. Pôa Liêng Hót Ngát, ngế hriăn cheăng ki rơkê dêi Ƀơrô Tuá lĕm tro cheăm Đam Rông 4, kong pơlê Lâm Đồng tối ăm ngin ‘nâi, tung la ngiâ kố ah, cheăm kô pơtối mơnhông mơjiâng mâu kâu lăk ƀô̆ tôu chêng a tâi tâng mâu thôn pơlê. Ƀă mâu ngế ki hâk git khôi túa, vêa vong vâi krâ roh nah trối pôa Dà Cắt Tư, mê khu râ hiăng chêh bro hồ sơ pâ thế Tơnêi têa vâ pôk inâi hnoăng ăm kơ pôa cho dó ngê̆ nhân ưu tŭ. Pôa Liêng Hót Ngát tối ăm ngin ‘nâi:

“Tung cheăm ngin kố preăng ai mơngế ki ai hiâm mơno trối pôa. Kơnôm ai tơdroăng ki kơdo mơ-eăm hnê tơdjâ, tối khĕn dêi pôa mê khôi túa tôu chêng dêi mơngế M’Nông, K’Ho a tíu kố hiăng châ rak vế, ƀă pơtối mơnhông mơdêk troh a hâi kố”.

Hơnăm kố hiăng châ luâ 75 hơnăm, pôa Dà Cắt Tư, ối a cheăm Đam Rông 4, kong pơlê Lâm Đồng xuân ối kơdo mơ-eăm chêh xo, thâo hrik tơrêm nâl rơngê ting ting, rêm tơdrá chêng koăng, tơdroăng xôi kiâ vâi krâ nah trối pơtối rak vế mơhúa dêi hdrông kuăn ngo tơná. Ing mâu kơxop hlá mơ-eá cho xua tơná pôa chêh bro dêi ta troh a mâu kâu lăk ƀô̆ tôu chêng xua pôa mơjiâng pro, hnê tối, cho tơdroăng ki pơtối rak vế tơdroăng ki krá kâk dêi ki tơdjêp dêi túa lĕm tro. Kơnôm ai tuăn mơno ki hâk mơnâ, vâ ‘nâng, ƀă rơkê plĕng trối pôa Dà Cắt Tư, mê túa lĕm tro dêi M’Nông ôh ta xê to châ rak vế mê ga ối châ mơdêk a kơlo ki nếo, lân lu rơdâ rơdĕng mot tung túa rêh kâ ối rêm hâi dêi chal nếo nôkố.