VOV4.Sêdang - Khu xiâm ngăn pơkeăng ƀă khăm pơlât pơcháu mâu hngêi pơkeăng râ tơnêi têa mơjiâng 3 tíu ki pơlât dâng 3 rơpâu xoăng koi pơlât tung Pơlê kong kân Hồ Chí Minh. Mê cho mơnhên dêi pôa Nguyễn Thanh Long, Ngế xiâm pơkuâ ngăn pơkeăng ƀă khăm pơlât a roh pêi cheăng ƀă khu râ kăn pơkuâ cheăng Đảng pơlê kong kân, Vi ƀan Pơlê kong kân Hồ Chí Minh ‘na tơdroăng hbrâ mơdât pơreăng tung pơlê kong kân tung kơxo lơ 29/7.

Pakĭng Hngêi pơkeăng pơlât ăm châ rơdêi prêi lĕm 1.000 to xoăng, Pơlê kong kân Hồ Chí Minh kô ai 3 tíu xiâm pơlât ăm châ rơdêi prêi lĕm ki ê xua mâu hngêi pơkeăng tơnêi têa pơkuâ

Pôa Nguyễn Thanh Long tối, tơdroăng ki kal rơhêng vâ ‘nâi má môi dêi Pơlê kong kân Hồ Chí Minh dế kố cho pro ti lâi vâ pơlât mâu ngế ki tro pơreăng ki râ ƀă kơdroh hlâ mơngế. Pakĭng mâu khu ƀok thái pơkeăng ki ƀeăn, ƀĕng, rơkê hiăng mơhnhôk hdrối mê, Khu xiâm ngăn pơkeăng ƀă khăm pơlât pơtối pơtroh mâu kăn pơkuâ kơ koan xiâm ki tơdjâk ƀă séa ngăn mâu hngêi pơkeăng râ ki má môi, hngêi pơkeăng chuyên khoa râ tơnêi têa mot a Pơlê kong kân Hồ Chí Minh vâ rơtế tơdjuôm ivá mơjiâng khu ki pơlât, ki rơhêng vâ tối cho khu ki pơlât ăm mâu ngế tro tâ COVID 19.

            A Sa Ly tơplôu ƀă tơbleăng