VOV4.Sêdang - Teăng mâ Ngế pro xiâm hnê ngăn Chin phuh, pôa Lê Minh Khái, Ngế pro xiâm phŏ hnê ngăn tơnêi têa nếo kĭ Pơkâ ‘na kơxô̆ liăn rôe tơ’nôm 19.998.810 kong kếo vaccine hbrâ mơdât COVID-19 BNT162 dêi Pfizer. Pơkâ tối nhên, xúa 2.652.537 rơtuh liăn ing kơxô̆ Liăn rôe vaccine COVID-19 Việt Nam vâ rôe tơ’nôm 19 rơtuh 998 rơpâu 810 kung kếo vaccine hbrâ mơdât COVID-19 BNT162 dêi Pfizer ƀă mơ’no liăn pêi pro mâu tơdroăng pâk vaccine hbrâ mơdât COVID-19 tiô pơkâ dêi Khu xiâm ngăn pơkeăng ƀă khăm pơlât.

Ngế pro xiâm hnê ngăn Chin phuh pơcháu Khu xiâm pơkuâ liăn ngân mơ’no Kơxô̆ liăn tiô pơkâ. Khu xiâm ngăn pơkeăng ƀă khăm pơlât, Khu xiâm pơkuâ liăn pôu râng hnoăng cheăng ‘na tơdroăng kố ƀă kơxô̆ tơbleăng. Tơdroăng pơkuâ, xúa, chêl kơxô̆ liăn kơpêng mê pêi pro tro tiô pơkâ, tro pơkâ, kơdĭng, châ tơƀrê, tơbleăng tơdrăng. Khu xiâm pơkuâ ngăn pơkeăng ƀă khăm pơlât tơbleăng Ngế pro xiâm hnê ngăn Chin phuh tơdroăng xúa kơxô̆ liăn nếo tiô pơkâ.

A Sa Ly tơplôu ƀă tơbleăng