VOV4.Sêdang - Hâi lơ 30/7, pôa Phạm Minh Chính, Ngế pro xiâm hnê ngăn Chin phuh pơkuâ Hneăng hôp mơ’no tơdrêng tung um tiô hyôh Internet dêi Chin phuh ƀă mâu kong pơlê ‘na tơdroăng hbrâ mơdât COVID 19 ƀă troăng tơkŭm po, pêi pro mâu tơdroăng xiâm, hnoăng cheăng châ Kuô̆k hô̆i hneăng má XV Pơkâ a Hneăng hôp má môi tơdjâk troh tơdroăng hbrâ mơdât COVID 19. Pôa Phạm Minh Chính tối ăm ‘nâi, roh pơreăng COVID 19 roh má 4 kố hiăng tơkâ hluâ vâ chê 100 hâi; pơreăng xông tâ tú ó, ki rơhêng vâ tối cho a Pơlê kong kân Hồ Chí Minh, mâu kong pơlê peăng Hdroh tơnêi têa ƀă peăng Tơdế tơnêi têa.

Tung pơla kố nah, rơtế ƀă tơdroăng pơkuâ, hnê mơhno dêi Đảng, Kuô̆k hô̆i hiăng pêi kơtăng, tơtro ‘nâng ƀă ‘’roh tơplâ hbrâ mơdât pơreăng COVID 19’’. Ngế pro xiâm hnê ngăn Chin phuh pơkâ mâu kăn teăng mâ veăng Hneăng hôp tơkŭm tơpui tơno ‘na tơdroăng hbrâ mơdât COVID 19, ing mê, Chin phuh kô ai Pơkâ dêi Chin phuh ‘na pêi pro mâu troăng hbrâ mơdât COVID 19.

A Sa Ly tơplôu ƀă tơbleăng