VOV4.Sêdang - Kơxo lơ 15/8, pôa Phạm Minh Chính, Ngế pro xiâm hnê ngăn Chin phuh pơkuâ po rôh hôp ‘no tơdrêng ing troăng hyôh internet mơgêi hnoăng cheăng hbrâ mơdât pơreăng COVID-19 ƀă mâu kong pơlê, pơlê kong kân dế pêi pro tơdroăng ki klâ ối krê pơlê pơla tiô pơkâ kơxô̆ 16/CT-TTg ƀă tơbleăng pêi pro tơdroăng kơxô̆ 86/NQ-CP dêi Chin phuh ‘na mâu troăng hơlâ pêi pro tơdrêng tung hbrâ mơdât pơreăng COVID-19.

Tơpui mơgêi rôh hôp, pôa Phạm Minh Chính tối nhên, tung pơla hdrối kố nah, tơdroăng ki pêi pro pơkâ 16 dêi Ngế pro xiâm hnê ngăn Chin mâu kong pơlê, pơlê kong kân hlo tơƀrê khât, pêi pro châ tơdroăng ki pơkâ mơ’no. Ngế pro xiâm hnê ngăn tơnêi têa tối nhên, tơdroăng dế ôh tá tơniăn, ai tíu ki ‘nâ gá dế rơ-iô khât. Tơdroăng ki kal xuân cho hbrâ mơdât pơreăng môi tơtrâ xâ, mơhnhôk tá khu pơkuâ tơdroăng kal kí, tâi tâng kuăn pơlê veăng hbrâ mơdât pơreăng.

Tâ tá rôh hôp

Ngế pro xiâm hnê ngăn tơnêi têa tối nhên, khŏm athế pâk vaccine ăm tâi tâng kuăn pơlê. Khu xiâm ngăn pơkeăng ƀă khăm pơlât cho kơ koan rak ngăn Tơnêi têa chiu pôu râng dêi hnoăng cheăng ‘na mơnhên tối ki dâi lĕm, hbru ăm hlá mơ-éa phêp, rak ngăn; pôi tá tơkŭm po tiô tơdroăng ki pâk xo liăn, ai pâk tíu ki xo liăn kal pơkâ pơxâu tơdrêng.

Mâu kong pơlê, pơlê kong kân dế pêi pro tơdroăng pơkâ 16 athế kơjo kum ăm hbrâ mơdât pơreăng, tíu ki lâi tơniăn mê athế mơjiâng pro kế tơmeăm, mơnhông mơdêk cheăng kâ.

Nga tơplôu ƀă tơbleăng