VOV4.Sêdang - Ngế pro xiâm hnê ngăn Chin phuh nếo ai mơ-éa kal pơtroh Kăn pơkuâ hnê ngăn cheăng Đảng pơlê kong kân, kong pơlê, Kăn hnê ngăn Vi ƀan Pơlê kong kân Hồ Chí Minh ƀă mâu kong pơlê: Bình Dương, Đồng Nai, Long An; Ngế xiâm mâu Khu xiâm, Kăn pơkuâ kơ koan râ xiâm, kơ koan ối tung Chin phuh; Khu hnê mơhno tơnêi têa hbrâ mơdât pơreăng COVID-19; Khu pêi cheăng dêi Chin phuh pêi pro tơdroăng hbrâ mơdât pơreăng COVID-19. Tung mơ-éa ki kal ai chêh tối: Xo cheăm, bêng, pơlê kân cho ‘’kơnâng kâng tât’’, kuăn pơlê cho ‘’mâu lêng’’ tung tơdroăng hbrâ mơdât pơreăng vâ kơbông krếo, mơhnhôk, tiâ tối, hnê mơhno, pơkâ thế kuăn pơlê ôh tá lo ing hngêi, ‘’kơbố ối ulâi athế ối amê’’, klâ kơtăn mơngế ƀă mơngế, hngêi ƀă hngêi, cheăm bêng ƀă cheăm bêng.

Kuăn pơlê cho tíu xiâm tung tơdroăng hbrâ mơdât pơreăng. Tơdroăng ki veăng, pêi tiô pơkâ dêi kuăn pơlê cho xiâm kối pơkâ châ tơƀrê tung hbrâ mơdât pơreăng. Kố cho hnoăng cheăng ƀă ki pơxúa dêi rêm ngế kuăn pơlê vâ rak vế ivá châ chăn ăm dêi tơná, rơpŏng ƀă pơlê pơla. Ƀlêi trâng pơreăng cho ƀlêi trâng dêi kuăn pơlê.

A Sa Ly tơplôu ƀă tơbleăng