VOV4.Sêdang - Hâi lơ 9/8, pôa Phạm Minh Chính, Ngế pro xiâm hnê ngăn Chin phuh pơkuâ hneăng hôp mơ’no tơdrêng tung um troăng hyôh internet tung lâp tơnêi têa ‘na tơdroăng pơkâ. Ngế pro xiâm hnê ngăn tơnêi têa thế mâu kăn pơkuâ hnê ngăn Đảng, kăn hnê ngăn Vi ƀan mâu kong pơlê dế pêi pro tơdroăng klâ ối kơtăn pơlê pơla thế pơtối pêi pro kơtăng, mâu kong pơlê ki lâi ôh tá klâ kơtăn pơlê pơla thế rah mơngế ăm lăm veăng mâu kong pơlê peăng Hdroh tơnêi têa, malối mơdêk rơkê plĕng na pêi tơdroăng mơdêk pro lĕm ivá drêng pơlât tơdrêng.

Hneăng hôp apoăng a tíu pêi cheăng dêi Chin phuh

Ngế pro xiâm hnê ngăn tơnêi têa krếo thế mâu kong pơlê mơdêk hnoăng cheăng ‘’hơ-ui kum dêi rơpó”; khĕn kơdeăn mâu kong pơlê ki veăng tơlo tơmeăm liăn ngân ăm mâu kong pơlê, pơlê kong kân peăng Hdroh tơnêi têa. Tơpui mơgêi a hneăng hôp, pôa Phạm Minh Chính thế mâu khu xiâm kơvâ cheăng pơtối tơmâng xo mâu tơdroăng hnê khĕn dêi mâu kong pơlê dêi mâu khu xiâm kơvâ cheăng tơrŭm pêi tơdroăng pơkâ.

Tơdroăng pơkâ kal pêi hdrối cho mâu pơkâ, hdró tăng tŭm tơdroăng, môi tiah luât pơkâ dêi Kuô̆k hô̆i, tơmâng ngăn nhên vâ ‘nâi ‘na tơmeăm khoăng tơnêi tíu ki tơ’lêi hlâu tung pêi cheăng dêi kong pơlê, khu xiâm kơvâ cheăng, kơ koan đông lêng, tíu pêi cheăng vâ veăng mơnhông cheăng kâ krá tơniăn ton. Ai pơkâ tro nếo ai tơdroăng tơkêa bro, tơdroăng tơkêa pro lĕm tro, ai khu ‘no liăn mơjiâng pro lĕm, xúa tro liăn ‘no mơjiâng tơmeăm khoăng, mơnhông cheăng kâ rêh ối châ tơ-ƀrê.

Gương tơplôu ƀă tơbleăng