VOV4.Sêdang - Kơxo lơ 30/8, a Hà Nội tơkŭm po Hneăng hôp veăng tơpui ‘na mơ-éa Tơbleăng Mơgêi Pơkâ kơxô̆ 19-NQ/TW dêi Hneăng hôp roh má 6, Khu xiâm pơkuâ tơnêi têa hneăng má XI ‘na pơtối pơ’lêh nếo troăng hơlâ, luât ‘na tơnêi tíu tung rơxông thăm mơnhông tŭm têk roh pơ’lêh nếo, mơjiâng xiâm kối vâ troh hơnăm 2020 tơnêi têa pin chiâng tơnêi pêi cheăng xúa kơmăi kơmok tiô rơxông nếo.

Ngế pro xiâm hnê ngăn tơnêi têa pơkuâ hneăng tơpui ‘na troăng hơlâ, luât tơdjâk troh tơnêi tơníu

Xông tơpui pơxiâm po Hneăng hôp, pôa Phạm Minh Chính, Kăn xiâm pơkuâ hnê mơhno, tối rơdêi: Klêi kơ’nâi vâ chê 10 hơnăm pêi pro Pơkâ kơxô̆ 19 – NQ/TW, pin hiăng châ tơƀrê hên tơdroăng ki kal tung mơnhông tơmeăm khoăng ing tơnêi tơníu ăm mơnhông mơdêk cheăng kâ – rêh ối pơlê pơla, veăng kum tơniăn tơdâng tơ’mô ƀă tơniăn pơlê pơla, cheăng lêng, gak kring; rak vế kong prâi ƀă kâi trâng ƀă kong prâi hơ’lêh. Laga tung tơdroăng pêi pro xuân ối ai hên tơdroăng ki ối tơvâ tơvân. Xua mê, Khu râ kăn xiâm pơkuâ hnê ngăn cheăng Đảng hiăng tơbleăng Pơkâ mơjiâng Khu hnê mơhno mơgêi 10 hơnăm pêi pro Pơkâ 19-NQ/TW.

Ngế pro xiâm hnê ngăn tơnêi têa pơkâ mâu kăn teăng mâ tơkŭm tơpui tơno ‘na mâu tơdroăng châ tơƀrê, mâu tơdroăng ki ối tơvâ tơvân, ối pá puât ƀă xiâm kối tung tơdroăng pêi pro Pơkâ 19-NQ/TW, ki rơhêng vâ tối cho mâu xiâm kối lo ing pin’’.

A Sa Ly tơplôu ƀă tơbleăng