VOV4.Sêdang - Kơxê lơ 27/8, klêi kơ’nâi rôh pêi cheăng ƀă kong pơlê Bình Dương, Ngế pro xiâm hnê ngăn tơnêi têa séa ngăn hnoăng cheăng hbrâ mơdât pơreăng a Đồng Nai, mơhnhôk vâi krâ nhŏng o kuăn pơlê kơhnâ veăng hbrâ mơdât pơreăng. Tíu ki apoăng Ngế pro xiâm hnê ngăn tơnêi têa troh cho hngêi mơhno túa lĕm tro cheăm Thạnh Phú, tơring Vĩnh Cửu, kong pơlê Đồng Nai tíu ki tơkŭm mâu kế tơmeăm tŏng kum, vâ kum mâu kế kâ ƀă hên ki ê troh ăm mâu ngế ki xơpá a kong pơlê. Ngế pro xiâm hnê ngăn tơnêi têa pôu, kơ-êng mâu ngế ki pleăng dêi hnoăng cheăng dế pêi cheăng akố, phiu ro hiâm mơno tŏng kum dêi rơpó, mâu ki xơpá kum mâu ngế ki xơpá tâ, rơhêng vâ rêm ngế pơtối mơ-eăm, pôi tá lôi ngế ki lâi kal kơjo kum vâ rơtế dêi rơpó rĕng tâ tơkâ luâ pơreăng kố.

Pơtối mê, Ngế pro xiâm hnê ngăn tơnêi têa troh pôu kơ-êng, mơhnhôk kuăn pơlê dế pêi pro klâ ối krê a mâu tơring, cheăm a tơring Vĩnh Cửu ƀă pơlê kong kơdrâm Biên Hòa. Klêi kơ’nâi lăm séa ngăn, Ngế pro xiâm hnê ngăn tơnêi têa hiăng ai rôh pêi cheăng ƀă kăn pơkuâ kong pơlê Đồng Nai. Akố Ngế pro xiâm hnê ngăn tơnêi têa pơkâ thế tơkŭm ăm mâu khu ki tŏng kum hbrâ mơdât a pơlê, cheăm, pôi tá ăm kuăn pơlê lo pa gong vâ rak tơniăn tơdroăng ki klâ ối krê châ pêi pro kơtăng. Athế rak tơniăn tơdroăng rêh ối pơlê pơla, tơniăn ăm kuăn pơlê. Pôi tá ăm kuăn pơlê kơklêa, ôh tá ai ếo xâp.

Katarina Nga tơplôu ƀă tơbleăng