VOV4.Sêdang - Pôa Phạm Minh Chính, Ngế pro xiâm hnê ngăn tơnêi têa nếo pơtroh kơthô mơhnhôk, kheăn kơdeăn mâu tơdroăng veăng kum, pleăng hnoăng cheăng ngế hbrâ mơdât pơreăng COVID 19. Mâu tơdroăng ki pleăng mê hiăng mơjiâng um méa lĕm troh lâp lu trâu hơngế tung roh plâ mơdât pơreăng. Đảng, Tơnêi têa mơnê, kheăn kơdeăn ‘nâng mâu tơdroăng veăng kum, dêi khu ngế pêi cheăng hbrâ mơdât pơreăng, ki má lối cho khu kăn ƀô̆ khăm pơlât.

Pôa Phạm Minh Chính, Ngế pro xiâm hnê ngăn tơnêi têa mơhnhôk khu ƀok thái pơkeăng

Tung la ngiâ, pơreăng xuân ối xông tâ tú ó, ôh tá ‘nâi tối hdrối. Pin mơnhên kố cho roh tơplâ mơdât ối ton, trâm hên pá puât. Ngế pro xiâm hnê ngăn tơnêi têa pói vâ khu hbrâ mơdât pơreăng pơtối mơhno tơdroăng ki khŏm mơ-eăm vâ kum kuăn pơlê. Pin ai loi tơngah, tơdroăng ki mơ-eăm khât ƀă khŏm mơ-eăm păng ‘nâng, mơ-eăm kân kĭn, pêi kơtăng tâ ƀă hên troăng pêi tơdâng tơ’mô, tơdroăng môi tuăn dêi kuăn pơlê, ki má lối pin kô ƀlêi trâng pơreăng.

A Sa Ly tơplôu ƀă tơbleăng