VOV4.Sêdang - Ƀơrô cheăng Chin phuh ai hlá mơ-éa pâ thế dêi pôa Lê Văn Thành, Ngế pro xiâm phŏ hnê ngăn tơnêi têa ‘na tơdroăng ki pro tơ’lêi hlâu ăm tơdroăng ki chơ mâu kế tơmeăm tung pơla ai pơreăng COVID-19. Tiah mê, pôa Lê Văn Thành, Ngế pro xiâm phŏ hnê ngăn Chin phuh pơkâ thế: Pôi tá séa ngăn a mâu tíu gâk séa ngăn pơreăng ƀă mâu rơxế ki ai Hlá mơ-éa ‘nâi ai QR Code ối hâi khế xúa xua Kơvâ ngăn troăng prôk ƀă rơxế kơtâu hbru, ăm phep chơ kế tơmeăm kum mơjiâng, tê mơdró, tê ngi kong têa ê, rôe xúa (tâng ôh ti xê kế tơmeăm ki tro mơdât, tê mơdró tiô pơkâ) a tâi tâng mâu troăng prôk tơdrăng, troăng prôk ngi kong pơlê, troăng prôk a tơring, troăng prôk a kơphô̆ tung lâp tơnêi têa.

Tâng rơxế ki lâi ôh tá ai hlá mơ-éa mơnhên ai QR Code lơ ai la hiăng tâi hâi khế mê séa ngăn tơdroăng ki chêh tối inâi châ chăn ƀă hlá mơ-éa mơnhên klêi kơ’nâi séa ngăn SARS-COV-2 ƀă mâu rơxế ki tối a kơpêng. A mâu kơpong ki ai pơreăng, mâu kong pơlê hbrâ rơnáu ai troăng hơlâ xing xoăng, tơkŭm mơhno troăng ăm tơtro vâ kơdroh tơdroăng ki mâu rơxế châ mot tung mâu tíu xiâm kơphô̆ vâ hbrâ mơdât pơreăng la athế rak tơniăn tơdroăng ki chơ, prôk a troăng, tê mơdró kế tơmeăm tung mâu kong pơlê.

Katarina Nga tơplôu ƀă tơbleăng