VOV4.Sêdang - Đăi tươ̆ng Phan Văn Giang, Kăn cheăng tung Khu xiâm kal kí, Ngế xiâm pơkuâ lêng tơnêi têa pin tơdah, trâm mâ tơpui tơno pôa Park Jae Min, Ngế xiâm phŏ pơkuâ lêng kong têa Hàn Quốc tung tơdroăng kăn teăng mâ râ xiâm kong têa kố troh Việt Nam tơpui tơno troăng hơlâ cheăng lêng Việt Nam – Hàn Quốc roh má 9. Đăi tươ̆ng Phan Văn Giang mơnhên tung vâ chê 30 hơnăm hiăng hluâ sap ing mơjiâng tơrŭm tơpui kâ, ki má lối cho mơjiâng tơrŭm cheăng ‘’Khu tơrŭm cheăng ton xŏn’’, tơrŭm pơla Việt Nam – Hàn Quốc mơnhông mơdêk rế hía rế ó rơdêi, trâu hơngế ƀă khât păng ‘nâng.

Pôa Phan Văn Giang, Ngế xiâm pơkuâ mô đô̆i  tơdah pôa Park Jae Min, Ngế xiâm phŏ pơkuâ lêng kong têa Hàn Quốc

Ki rơhêng vâ tối cho cheăng kâ, tê mơdró ƀă mơ’no liăn cheăng, kum mơnhông mơdêk  cheăng kâ – rêh ối pơlê pơla, thăm hlê plĕng dêi pó ƀă tơrŭm pơla kuăn pơlê ƀă khu lêng péa tơnêi têa. Kheăn kơdeăn tơdroăng châ tơƀrê roh tơpui tơno cheăng lêng Việt Nam – Hàn Quốc roh má 9 ƀă mâu tơdroăng mơ-eăm, mâu tơdroăng châ tơƀrê pơla Khu xiâm pơkuâ lêng péa tơnêi têa tung pơla kố nah, pôa Phan Văn Giang pói vâ tung la ngiâ, péa pâ pơtối thăm tơrŭm tâ mê nếo tơrŭm cheăng châ tơƀrê ƀă păng ‘nâng tung hên kơvâ cheăng.

A Sa Ly tơplôu ƀă tơbleăng