VOV4.Sêdang - Ƀă tơdroăng ki rơhêng vâ tŏng kum kuăn pơlê tung kơpong ki mơdât prôk lăm, mot lo, kơdroh iâ ki xơpá, vâi krâ nhŏng o mâu hdroâng kuăn ngo a kong pơlê Dak Nông hiăng tơkŭm lối tâ̆n kế tơmeăm pêi lo ing chiâk deăng tŭm túa pơtroh a Pơlê kong kân Hồ Chí Minh ƀă mâu kong pơlê peăng Hdroh, veăng kum hbrâ tơplâ mơdât pơreăng COVID-19.

Ngoh K’Tư, a kơpong hngế hngo Ƀon Sê Rê A, cheăm Dak Som, tơring Dak Glong, kong pơlê Dak Nông, ôh ti xê kum to tâi tâng mâu hnông priât dêi rơpŏng, mê ối tí tăng hên mâu kơchâi kong “kơchâi ki kơhiâm tơviah” dêi cheăm pơtroh ăm vâi krâ nhŏng o mâu kong pơlê peăng Hdroh dế tro mơdât prôk lăm xua pơreăng. Ngoh K’Tư ăm’nâi.

“Á hiăng pơtroh péa tă priât ƀă tŭm túa kơchâi pôm ló, kơchâi kơchâi hmốu (nâl M’nông tối cho beăp). A cheăm kố ai mâu túa kơchâi mê rơpŏng á hiăng lăm tung kong kêi vâ pơtroh ăm kuăn pơlê a pơlê kong kân. Tung la ngiâ ah, á xuân môi tiah rơpŏng kô pơtối veăng kum ăm plâi ƀơr, tơpăng. Nôkố troh rơnó tơpăng mê ai tá tơpăng kong ƀă tơpăng pêt, rơpŏng á pơtối ai mâu kế tơmeăm ki ku kŭn, iâ êt mê vâ pơtroh ăm vâi krâ nhŏng o a pơlê kong kân”.

Mâu kơchâi, plâi, pôm kuăn pơlê hbrâ vâ pơtroh ăm mâu kong pơlê peăng Hdroh

Xuân môi tiah mê há, a kơpong tíu tơkăng kong thôn Thuận Hải, cheăm Thuận Hạnh, tơring Dak Song, rơpŏng ngoh Trịnh Văn Khởi hiăng kum lối 2 tâ̆n kơchâi, plâi, pôm ƀă trŏng ‘nhŭng, hơpê lŭm, priât, plâi ƀơr ăm vâi krâ nhŏng o a kơpong ki ai pơreăng. Ngoh ối mơhnhôk vâi krâ nhŏng o ki ê tung thôn tơlo kế tơmeăm kum iâ la hiâm mơno hơ-ui pâ hên, rêm ngế veăng kum môi iâ kế tơmeăm pêi lo ing chiâk deăng ki tơná pêi lo ƀă rơhêng vâ kum ăm kuăn pơlê kơpong ki ai pơreăng tơkâ luâ xơpá.

“Rơpŏng á ai môi iâ kơchâi, plâi, pôm môi tiah trŏng ‘nhŭng, póu, tơ-uâ, priât, ƀơr mê xuân hiăng veăng kum pơtroh ăm vâi nhŏng o ki hliăng tiâ. Tung to lâi hâi kố hlo tơdroăng ki pơreăng tâ tú, tơdroăng rêh ôh tá tơniăn mê on veăng á rơtế djâ dêi rơpó lăm mơhnhôk vâi krâ nhŏng o dế ai kế tơmeăm pêi lo ing chiâk deăng veăng kum ăm vâi krâ nhŏng o kơpong ki ai pơreăng. Hâi kố á rơtế ƀă mâu nhŏng o ki ê xuân hiăng veăng kum priât, plâi hung, kơchâi súp lơ vâ chê 4 tâ̆n vâ hbrâ ăm rơxế ki chơ a kong măng kố ah troh ăm vâi krâ nhŏng o a Pơlê kong kân Hồ Chí Minh ƀă Bình Dương”.

Vâi krâ nhŏng o tơring tơkăng kong Tuy Đức chơ kế tơmeăm pêi lo ing chiâk deăng pơtroh ăm kuăn pơlê a kơpong ki ai pơreăng

A cheăm Dak Buk So, tơring tơkăng kong Tuy Đức, kong pơlê Dak Nông, vâi krâ nhŏng o xuân veăng kum, mơhnhôk veăng tơlo châ lối 30 tâ̆n kế tơmeăm ki pêi lo ing chiâk deăng pơtroh ăm kuăn pơlê a kơpong ki ai pơreăng. Pôa Nguyễn Văn Anh, kăn pơkuâ ngăn Đảng ủy, kăn hnê ngăn Vi ƀan hnê ngăn cheăm Dak Buk So ăm ‘nâi:

“Cheăm ngin cho kơpong tơkăng king tơdroăng rêh ối vâi krâ nhŏng o ối trâm hên xơpá. La drêng rêm râ kơvâ cheăng, râ kăn pơkuâ cheăm mơhnhôk tŏng kum mâu kế tơmeăm ki kal vâ veăng pêi pro kơdroh iâ tơdroăng ki xơpá troh a kơpong ki ai pơreăng mê cho môi hiâm mơno. Ai vâi krâ nhŏng o ki ‘nâ vâi chơ dêi kế tơmeăm cho kơchâi, plâi, pôm troh a Vi ƀan hnê ngăn cheăm, ai mâu ngế ki ‘nâ ăm mâu khu rơtăm, vâi kơdrâi, kuăn pơlê ki pêi chiâk deăng mot tơdrêng tung kơdrum vâ kêi, krí veăng kum ăm nhŏng o ki xơpá”.

Maluâ Tây Nguyên xuân dế hbrâ mơdât ƀă pơreăng COVID-19 dế tâ tú, rêh ối ôh tá tơniăn, la ƀă hiâm mơno hơ-ui, “môi chŭp  drêng kơklêa tơ’mô ƀă môi tơdrong drêng phâi”, kuăn pơlê hdroâng kuăn ngo a tíu kố hbrâ rơnáu “kum hmê, hmân ếo” ƀă mâu kế tơmeăm “ki tơná pêi lo” kum kuăn pơlê a Pơlê kong kân Hồ Chí Minh dế athế klâ krê tung pơlê pơla vâ kơdo mơ-eăm tơkâ luâ pơreăng kân.

VOV Tây Nguyên

Katarina Nga tơplôu ƀă tơbleăng