Dak Lak cho môi tung mâu kơpong pêt plâi sầu riêng ki hên dêi lâp tơnêi têa, ƀă tâi tâng ƀăng lối 41.000 hectar, pêi lo plâi hơnăm 2026 châ dâng 500.000 tâ̆n. Tơdroăng pêi pêt rak ngăn tơtro châ pêi pro sap hâi lơ 26/10 troh lơ 26/11 a 35 cheăm, bêng. Tơdroăng ki xiâm tơkŭm hnê mơhno kuăn pơlê pêi chiâk deăng troăng pêi pêt mơjiâng tiô VietGAP; xúa phon rơvât, pơkeăng rak vế kơchâi plâi pôm tiô pơkâ; pơkuâ rak têa, krí xo, bro, rak ngăn tơniăn plâi kâ ƀă ti tăng xiâm kối.

Rơtế amê cho hnê mơhno mâu pơkâ ‘na mah kơxô̆ kơpong pêt, pơkuâ ki dâi lĕm ƀă mơdêk ki châ tơƀrê bro plâi sầu riêng. Tơdroăng pêi cheăng kô gum kuăn pơlê pêi chiâk deăng hlê plĕng, chôa ‘lâng pơhlêh tơdroăng ki hmâ pêt mơjiâng, pêt rak ngăn tiô pơkâ VietGAP ƀă hbrâ pơkuâ ‘noăng chư chêh kơpong pêt. Ing mê, mơjiâng xiâm kối dâi lĕm, rak kơpong pêt ki loi tơngah plâi sầu riêng Dak Lak, mơdêk ivá tơbriât cheăng ƀă mơdêk kơvâ mơnhông mơdêk krá tơniăn.