Kơmăng mơ'nui măng tĭng, hngêi hôp tơdjuôm pơlê pơla a pơlê Dak Ndrung, cheăm Đức An, kong pơlê Lâm Đồng hơniâp ro tâng to idrâp chêng. 25 ngế hriâm châ mâu ngê̆ nhân, vâi krâ hnê mơhno tơrêm idrâp chêng, ing túa ki râng chêng troh túa ki tŏn pro ti lâi ăm i tơtro. Ing tơrêm rôh pơtâp, idrâp chêng rế hía rế rơ-eăng ro, hmâ achê. Nâ Thị Hợi, phiu ro tối:

“Hdrối vâ mơhriâm, á tơmiât tŏn chêng pá khât. La veăng tung lâm hriâm kố, á hlo ôh tá pá môi tiah pin tơmiât. Troh nôkố, á hiăng chiâng tŏn pái ƀai chêng ki xiâm. Hâk phiu xua tơná hiăng chiâng tŏn chêng. Á kô mơ-eăm pơtâp tơ'nôm vâ veăng kum rak vế khôi túa dêi kuăn ngo tơná”.

Lâm hnê tŏn chêng apoăng ai tơdroăng tŏng kum dêi khu kăn pơkuâ cheăm Đức An ƀă kơvâ ngăn 'na mơhno túa lĕm tro kong pơlê Lâm Đồng. Klêi kơ'nâi mơgêi lâm hriâm, mâu vâi nâ o xuân ối mơ-eăm rak vế dêi hâi khế pơtâp a hngêi mơhno túa lĕm tro pơlê Dak Ndrung. Tơniăn a mâu kơmăng mơ'nui măng tĭng, vâi nâ o pơrá tơkŭm tơdroăng pêi chiâk pêi deăng, tơdroăng cheăng tung rơpŏng hngêi vâ rơtế ƀă dêi rơpó pơtâp rêm ƀai tŏn chêng, pơchân dêi rơpó rêm tơdrá tŏn. Mâu rôh pơtâp mê hiăng kum idrâp chêng rế chiâng hmâ, rế mot trâu hơngế tung tơdroăng rêh ối pơlê pơla. Jâ Điểu Thị Huế – Kăn phŏ pơkuâ hnê ngăn Chi ƀô̆, Kăn hnê ngăn Măt trâ̆n pơlê Dak Ndrung tối:

“Peăng kơxo, vâi nâ o lăm pêi chiâk, pêi cheăng ăm dêi rơpŏng hngêi. Troh kơxêi nếo tơkŭm a hngêi hôp tơdjuôm vâ hriâm tŏn chêng. Ngế ki lâi xuân hơniâp ro, hâk vâ. Kơnôm ing tơdroăng ki tơmâng ngăn, tŏng kum ƀă pro tơ'lêi hlâu dêi Khu pơkuâ, Ƀơrô ngăn 'na mơhno túa lĕm tro, vâi krâ-nhŏng o ngin ai tơ'nôm roh ki vâ rak vế, chôu 'măn ƀă mơnhông mơdêk mâu tơdroăng ki kơnía git dêi hdroâng kuăn ngo tơná.”

Ƀă mâu ngê̆ nhân, vâi krâ rơkê, tơdroăng hnê tŏn chêng ôh tá xê to hnê túa xúa môi túa chêng, mê cho pơtroh ăm tá tơdroăng rêh ối, kum rơxông ối nếo hlê plĕng rêm ƀai chêng chuât tung rôh ki lâi, ai pơxúa klâi, vâ ing mê hâk tơngăm, rak vế, pêi pro tung tơdroăng rêh ối dêi pơlê cheăm. Ing rêm rôh pơtâp, Ngê̆ nhân Thị Dryan púi vâ ai tơ'nôm hên ngế hơnăm ối nếo tăng troh ƀă chêng koăng:

“Cheăm Đức An hiăng pro tơ'lêi hlâu ăm pơlê po lâm hnê tŏn chêng vâ mâu vâi pú hơnăm ối nếo ai tơdroăng ki hâk vâ châ hriâm tâp. Ing po lâm hnê hriâm, ngin pói vâ hnê mâu ƀai chêng ton nah ăm rơxông ối nếo, vâ kuăn cháu ôh tá piu tơdrá, tơdroăng, tơmeăm khoăng ki pâ pôa hiăng rak vế sap ing ton nah.”

Vâ mơhnhôk mâu ngê̆ nhân pơtối hnê mâu tơdroăng ki lĕm tro ăm rơxông kơ'nâi, klêi kơ'nâi 'mot tơkŭm cheăm, Vi ƀan cheăm Đức An hiăng tơbleăng Pơkâ tŏng kum rêh ối pơlê pơla rêm khế ăm péa Ngê̆ nhân Ưu tú dêi pơlê Dak Ndrung. Tung mê, Ngê̆ nhân Ưu tŭ Thị Phyơn, Kăn pơkuâ ngăn Khu hơdruê xuăng dêi pơlê Dak Ndrung, châ tŏng kum lối 3 rơtuh liăn rêm khế. Ƀă jâ, kố cho tơdroăng ki tơmâng khât tung tơdroăng rak vế túa lĕm tro M'Nông.

“Á hâk tơngăm ƀă mơnê Đảng, Tơnêi têa hiăng ai troăng hơlâ tŏng kum ăm á lối 3 rơtuh liăn rêm khế. Kố cho tơdroăng ki mơhnhôk kân vâ á pơtối rak vế khôi túa lĕm tro. Á kô pơtối hnê mơhno, hnê túa tŏn chêng ăm khu rơxông nếo, djâ khu tŏn chêng vâi kơdrâi mơnhông tâ, vâ kuăn cháu pơtối rak vế tơdroăng, tơmeăm khoăng ki kơnía dêi pâ pôa."

Ing mâu tơdroăng ki kơnía 'na mơhno túa lĕm tro châ rak vế, cheăm Đức An dế pơkâ mơjiâng tíu ôm hyô pơlê pơla a pơlê Dak Ndrung. Tơmối kô ai roh châ tâ, châ hlo chêng koăng, mâu leh mơdĭng, cheăng tĕn hmôu jiâ ƀă kế kâ M'Nông. Tung mê, hngêi mơhno túa lĕm tro pơlê pơla cho tíu ki xiâm, mơđah tơbleăng mâu tơmeăm khoăng tiô khôi vâi krâ nah, mơhno túa lĕm tro pơlê pơla ƀă mâu tơdroăng mơhno túa lĕm tro ôm hyô. Jâ Thị Rơi, Kăn pơkuâ hnê ngăn Chi ƀô̆ pơlê Dak Ndrung, tối:

“Tơdroăng ki mơhnhôk vâi nâ o, đoân viên droh rơtăm veăng hriâm tŏn chêng koăng ôh tá xê to rak vế túa lĕm tro mê ối mơdêk tơdroăng ki tơrŭm pơlê pơla. Cheăm hiăng mơ'no liăn mơjiâng pro hngêi mơhno túa lĕm tro nếo ăm pơlê, pro tơ'lêi hlâu vâ vâi krâ-nhŏng o tơkŭm hôp, hriâm tâp. Ngin pói vâ djâ mâu tơmeăm, kế tơmeăm xúa tiô khôi vâi krâ nah 'măn akố, vâ mâu rơxông nếo hlê plĕng tâ 'na túa lĕm tro dêi hdroâng kuăn ngo."

Ing kơpeăng kŏng khăng hbo xua kong tô kong mêi dêi chiâk deăng, mâu vâi kơdrâi M'Nông a pơlê Dak Ndrung dế pơtâp, rak hiâm mơno ăm idrâp chêng pơlê xiâm. Tơdrá chêng ki mơhno mơđah a hngêi mơhno túa lĕm tro pơlê pơla xuân ối chuât tơniâ rêm măng tĭng, idrâp chêng chuât xơtó djâ khôi túa lĕm tro pơlê cheăm troh hơngế rơtế ƀă tơdroăng mơnhông dêi pơlê xiâm Đức An, Lâm Đồng.