Kong pơlê Lâm Đồng dế hbrâ rơnáu, po rơdâ tíu ki mơđah tơbleăng reăng ƀă tơkŭm po hên tơdroăng túa lĕm tro, ngê̆ thuât. Pêi pro Festival, troh nôkố, lối 70 to cheăm, bêng dêi kong pơlê Lâm Đồng hiăng tơbleăng tơdroăng “Kuăn pơlê pêt reăng, hngêi hngêi pêt reăng, xiâm loăng ngiât koh hâk Festival Reăng Đà Lạt rôh XI hơnăm 2026”.

Krê mâu bêng tung kơpong tíu xiâm Đà Lạt dế tơbleăng pêt hên reăng a mâu troăng prôk, kế tơmeăm ki rơnuâ, vâ pro ngiâ méa ngiât, krúa ăm kơphô̆ ôm hyô Đà Lạt. Festival Reăng Đà Lạt hơnăm 2026 xuân tơbleăng pêi pro hên tơdroăng nếo, môi tiah tơrŭm reăng ƀă tơdrá proâ ing mâu rôh po tơdroăng: “Ki lĕm dêi reăng”; “Tơdrá hơniâp dêi reăng Đà Lạt”; “Tơdroăng hơdruê ƀă Reăng”.

Pôa Đinh Văn Tuấn, Phŏ hnê ngăn Vi ƀan kong pơlê Lâm Đồng, ăm ‘nâi, tơdroăng po rơdâ tíu tơkŭm po, thăm mơdêk ki veăng dêi kuăn pơlê châ tơngah kô pro ivá tơdjâk ăm Festival hơnăm kố.