Kuât châ ‘no 3 rơtal liăn pro, ai ƀăng tơnêi pro dâng 156 met karê, xŏn 21,2 met, djâ vế khôi túa chal krâ dêi mơngế Jarai. Kuât kố châ krâ pul on, kế ki hbrâ mơdât tơro têa, hbrâ mơdât on chếo, pro chiâng tơnêi tíu ki hôp trâm mâ ối tơdjuôm, tơkŭm po mơdĭng ƀă rak vế khôi túa lĕm tro hdrông kuăn ngo.

Rơtế tung rôh kố, mâu tíu pêi cheăng pơcháu “On bâ eăng a pơlê cheăm pơlê” a mâu cheăm Ia Nan, Ia Pnôn ƀă Ia Krêl. Ƀă kơxô̆ liăn gum lối 1,6 rơtal liăn tung rôh má 2 hơnăm 2026, tơdroăng kố tiô tối hdrối ki krâ ‘măn 533 to trăng pul on kơtâu ƀă tôu mâ hâi a 18km troăng, a 12 kơpong kuăn pơlê rêh ối a Gia Lai, Quảng Ngãi ƀă Quảng Trị. Mâu tơmeăm pro veăng gum pơhlêh tơdroăng rêh ối, rak tơniăn gâk kring, tơniăn ƀă tơrŭm pơla lêng ƀă kuăn pơlê tíu tơkăng kong.