Tiô tối tơbleăng, tơtêk cheăng kâ 9 khế hơnăm 2026 dêi kong pơlê Quảng Trị châ lối 8,4%, nâp liăn ngân vâ chê 9.200 rơtal liăn. Tơpui mơgêi, pôa Lê Tiến Châu, Phŏ Ngế pro xiâm hnê ngăn Chin phuh mơhno pái tơdroăng ki xơpá kân, mê cho thăm mơnhông tá hâi châ tiô tơdroăng chêh pro, ivá mơnhông ối tơkôm tung mâu tơdroăng tơkêa bro on tơhrik ki kân ƀă tơdroăng ki ‘no liăn pêi cheăng tơdjuôm ối hrá.

Phŏ Ngế pro xiâm hnê ngăn tơnêi têa pơkâ thế kong pơlê pêi pro 8 hnoăng cheăng ki kal, tung mê mơnhên ‘no liăn ngân pêi cheăng tơdjuôm cho hnoăng cheăng kal kí; lêi tah tơvâ tơvân mâu tơdroăng ki ối tá hâi tơleăng klêi; mơdêk ivá ki ai hlâu ‘na on tơhrik, kơno tuk, bo cheăng ƀă tơdroăng cheăng kâ peăng mâ hâi Lo – peăng mâ hâi Lu; rĕng pro klêi tơdroăng tơkêa kơpong cheăng kâ tê mơdró luâ tơkăng kong Lao Bảo – Densavan ƀă mơjiâng pro kơpong cheăng Côn Cỏ. Tơdrêng amê hlối mơdêk ki rơkê tung hnê hriâm klêi kơ’nâi ‘mot tơkŭm hngêi trung hriâm.