A roh trâm mâ, Kăn teăng mâ Việt Nam a kong têa Ƀih, jâ Nguyễn Hương Trà,  Kăn pơkuâ Khu râ  Việt Nam a Khu tơrŭm châu Âu tối ăm 'nâi, nôkố ai dâng 1,5 rơtuh ngế Việt Nam rêh ối a châu Âu. Pơlê pơla rế hía rế mơnhông, tơrŭm lĕm, tơrŭm, rak vế khôi túa lĕm tro ƀă ai hên hnoăng veăng 'no ăm pơlê xiâm, tơnêi têa.

Tơpui akố, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tơmâng xo, khĕn kơdeăn mâu hnoăng veăng 'no dêi pơlê pơla mơngế Việt Nam a châu Âu, malối cho hnoăng cheăng dêi mâu khu tơrŭm tung 'mâi mơnhông tơrŭm môi tuăn ƀă mơdêk tơrŭm tơroâ pơla Việt Nam ƀă mâu kong têa.

Tối nhên, tơnêi têa dế mot tung hneăng mơnhông mơdêk nếo, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế kuăn pơlê pơtối mơnhông tuăn ngôa rơkê, túa ki rơkê tơtro, ivá cheăng; tơdjêp khu mơdró kâ, khu ki rơkê plĕng, tuăn ngôa rơkê ƀă mơdêk pơhlêh xúa khoa hok, kŏng ngê̆ vêh a tơnêi têa. Mâu kơ koan teăng mâ Việt Nam a kong têa ê kal pêi pro lĕm tro hnoăng cheăng kring vế kuăn pơlê, tŏng kum pơlê pơla, pro tơ'lêi hlâu vâ kuăn pơlê veăng 'no hnoăng cheăng pêi ki kal ăm tơdroăng mơjiâng ƀă mơnhông tơnêi têa.