A rôh hôp, khu kăn tối, tơdroăng ki hbru ăm mah kơxô̆ kơpong pêt ƀă mah kơxô̆ tíu kơxuô tâ tung kơthung cho tơdroăng ki kal vâ tơmeăm pêi lo ing chiâk deăng ki vâ tê ngi kong têa ê ing troăng ki xiâm. Laga, vâ mơdêk ki tơƀrê, mâu cheăm bêng, khu pêi cheăng tơrŭm, khu mơdró kâ ƀă kuăn pơlê ki pêt kal tơtrŏng rak vế tơdroăng pêt, hbrâ mơdât oâ hdrong kâ ‘nhiê, xúa pơkeăng xôh kơdê oâ hdrong tro pơkâ ƀă tơbleăng tơdrăng tíu ki pêt.

Jâ Hồ Thị Bích Kiều, Ngế xiâm pơkuâ Ƀơrô cheăng kâ cheăm Ea Knuêč, tối mâu tơdroăng ki tơvâ ki trâm khât kal châ tŏng gum tơdrêng:

“Nôkố, cheăm dế xơpá tung tơdroăng ki mơnhên tíu dêi rêm ƀăng tơnêi tiô pơkâ, xua tơdjâk troh mâu kŏng ti, khu mơdró kâ kơphế. A tơnêi nôkố mâu kŏng ti ki hên cho pêt kơphế, la drêng pêi pro mah kơxô̆ kơpong pêt krê ăm rêm túa hdrê pêt mê chiâng trâm tơdroăng tơvâ tung tơdroăng ki mơnhên inâi khĕn, kĭng kơpong pêt. Sap ing mâu xơpá mê, cheăm bêng kal hâ gum ‘na tơdroăng ki rơkê, hnê mơhno pêi pro tro pơkâ”.

Mâu kăn xuân tối túa ki rơkê tơtro tung tơkŭm pêi pêt ƀă tơrŭm tê tơmeăm tơdjâk troh mah kơxô̆ kơpong pêt. Teăng mâ khu mơdró kâ, khu pêi cheăng tơrŭm tối tiah kố, mah kơxô̆ kơpong pêt bu ai pơxúa drêng tơdjâk ƀă tơdroăng ki séa ngăn dêi tơná, chêh tối tung hlá mơ-éa ƀă xúa phân mêm ti tăng xiâm kối. Tơdroăng pêi pro tiô pơkâ pêi ki kal vâ rak vế tơniăn mah kơxô̆, kơdroh tơdroăng ki mơni kô tro kơchơ tê mơdró mơnhên tối lơ xo tơvêh mah kơxô̆ kơpong pêt.

Pôa Lê Quốc Thanh, Kăn pơkuâ Tíu xiâm hnê mơhnhôk pêi chiâk deăng Tơnêi têa, mơnhên mah kơxô̆ kơpong pêt nếo bú cho tơdroăng ki apoăng; tung tơdroăng ki kal tâ cho tơkŭm pêi pêt ƀă rak vế mah kơxô̆ vâ tơmeăm pêi lo châ tê tơniăn tung mâu kơchơ tê mơdró.

“Pin athế mơnhên nhên ‘na cheăng, hnoăng pơkuâ, ki pơxúa, hnoăng cheăng pôu râng tơrêm ki tơdjâk tung môi tơdroăng tơrŭm. Cho ngế ki pêt mê athế mơnhên nhên hnoăng dêi tơná drêng veăng tơrŭm. Khu mơdró kâ xuân môi tiah mê, malối cho kơ koan tơnêi têa, kơ koan ki rơkê cheăng, khu ki hnê mơhnhôk pêi chiâk. Tiah mê nếo mơjiâng pro mah kơxô̆ kơpong pêt vâ pơtối châ tê tung mâu kơchơ tê mơdró”.