Pôa Lê Minh Hưng, Ngế pro xiâm hnê ngăn tơnêi têa tối nhên: Hơnăm 2026 châ hlo tơdroăng cheăng kâ mơnhông tơƀrê tâi tâng ƀă 14/15 tơdroăng pơkâ pêi châ ƀă tơkâ luâ. Mot tung hơnăm 2027, Việt Nam khŏm mơ-eăm mơdêk rĕng, mơnhông tơƀrê ƀă tơdroăng pói tơngah mơdêk GDP sap ing 10% tơngi klêng. Mâu kăn teăng mâ kal pơkâ thế pơtối pơhlêh nếo, mơhnhôk ivá mơnhông mơdêk tiô khôi vâi krâ nah mê cho mơ'no liăn cheăng tơnêi têa, tê tơmeăm ngi kong têa ê, rôe xúa tơmeăm; tơdrêng amê hlối mơhnhôk ƀă mơdêk mâu ivá mơnhông mơdêk nếo môi tiah cheăng kâ krúa lĕm kong prâi, cheăng kâ xúa kŏng ngê̆ kơxô̆, cheăng kâ tơƀrê.

Rơtế amê, tah lôi mâu tơdroăng ki tơvâ tơvân ăm mâu tơdroăng tơkêa bro ki kal, mơdêk rĕng tơdroăng mơ'no liăn cheăng tơnêi têa, mơdêk ki tơƀrê pơkuâ ngăn kong pơlê péa râ ƀă mơdêk 'mâi hơ'lêh pro hlá mơ-éa rêh ối cheăng kâ ƀă tơnêi têa. Mâu kăn xuân tối tiah kố, tơdroăng pơkâ pêi hơnăm 2027 kal tơmiât troh ki ôh tá tơdrêng dêi mâu tơdroăng ki ôh tá tơniăn hơnăm 2026, malối cho tơdroăng ki yă on tơhrik pơtối ối a kơlo ki kơnâ, liăn ôh tá kơnâ drêng mâu troăng hơlâ tŏng kum nâp hnoăng liăn mơhá châ 'mâi hơ'lêh.

Tiô mâu kăn Kuô̆k hô̆i, hnoăng cheăng dêi hơnăm 2027 cho hngăm hngo la ƀă tơdroăng ki xiâm ki kal hiăng châ pêi pro, rơtế ƀă tơdroăng ki mơ-eăm hluâ tâ kơ mê dêi tâi tâng khu cheăng kal kí, khu mơdró kâ ƀă kuăn pơlê, tơngah tơtêk péa kơxô̆ hơnăm 2027 kô chiâng tơdroăng ki ai khât.