Kăn xiâm hnê ngăn Kuô̆k hô̆i ăm 'nâi, klêi kơ'nâi lối môi hơnăm pêi pro Luât tơnêi tơníu hơnăm 2024, mâu tơdroăng pá puât 'na pơkâ hdró, pơkâ yă, xo tơvêh, pơcháu ƀă ăm mung tơnêi hiăng hlo nhên, malối tung pơla tơkŭm po khu râ kăn pơkuâ kong pơlê péa râ. Tơdroăng 'mâi hơ'lêh luât kal tơmiât troh mơjiâng luât ki xiâm, pơkâ mâu tơdroăng ki xiâm, tơdrêng amê ai troăng hơlâ tơ'lêi hlâu, tơdâng tơ'mô ƀă 'mâi hơ'lêh cheăng tơnêi têa, pơ'lêh kơxô̆ ƀă mâu luât ki tơdjâk.

'Na yă tơnêi, Kăn xiâm hnê ngăn Kuô̆k hô̆i pơkâ thế mơnhên tơdroăng xúa kơlo yă tơnêi ƀă kơxô̆ ki pơhlêh tung chêl thiê̆n, riân liăn xúa tơnêi, liăn mung tơnêi; rak tơniăn yă achê ƀă yă pơkâ tê mơdró la ôh tá pơklât thế tiô kơchơ tê mơdró, ví tơdroăng "yă pơklât yă", pro kơxô̆  liăn ‘no kơ drâ tâk ƀă tơdroăng tơkêa bro hrá.