Hneăng hôp châ tơkŭm po tơdrêng, hlối mơ'no tơdrêng tung um tơvi troh 124 tíu mơ'no a cheăm, bêng, kơpong. Kong pơlê Lâm Đồng nôkố ai lối 621.000 ngế droh rơtăm, tung mê ai lối 108.000 ngế droh rơtăm hdroâng kuăn ngo. A rôh tơpui tơno, 20 tơdroăng kơ-êng, pâ thế dêi kăn ƀô̆ Đoân, đoân viên, droh rơtăm tơkŭm a mâu tơdroăng ki kal, môi tiah tŏng kum liăn pơxiâm pêi cheăng, tơdjêp ƀă kơchơ mơdró, tê mơdró mâu tơmeăm hriăn plĕng khoa hok, pơkâ troăng hơlâ hnê cheăng pêi, tăng cheăng pêi, tơ'mot mơngế pêi cheăng hơnăm ối nếo ƀă troăng hơlâ hngêi ối pơlê pơla.

Teăng mâ mâu khu xiâm, kơvâ cheăng dêi kong pơlê hiăng tiâ, mơnhên hên tơdroăng droh rơtăm tơmâng. Tơpui tơno ƀă mâu droh rơtăm, pôa Hồ Văn Mười, Kăn hnê ngăn Vi ƀan kong pơlê Lâm Đồng, pâ thế mâu droh rơtăm thế hbrâ tăng ‘nâi plĕng mâu rôh tơ’lêi, pơtối rak vế tơmeăm khoăng, ki hlâu dêi kong pơlê, khên pơxiâm pêi cheăng ing túa pêi cheăng tơtro ƀă tơdroăng ki ai khât.