Kăn hnê ngăn péa pâ tối tơhrâ kô pơtối po trâu rơdâ tâ nếo tơrŭm cheăng tung tŭm tơdroăng, tung mê ai tơdroăng mơdêk ‘no liăn mơjiâng tơmeăm khoăng tung hriăn plĕng troăng hơlâ tung lâp plâi tơnêi Global Gateway ƀă tơrŭm cheăng pơ’lêh pêi pro, xúa on tơhrik tơdâng tơ’mô JETP; tối nhên ki kal dêi tơdroăng tơbleăng tŭm tơdroăng kĭ tơhrâ tê mơdró pơla Việt Nam - EU EVFTA hlối rĕng kĭ tơhrâ tơniăn ‘no liăn cheăng pơla Việt Nam - EU EVIPA.

Péa pâ xuân môi tuăn mơ-eăm tơmiât troh mơnhông tơrŭm 'na tơmeăm khoăng ki kal; pơtối mơdêk tơrŭm tung mâu kơvâ cheăng kŏng ngê̆ ƀă pơhlêh nếo tơmiât pêi rơkê, hnê hriâm ƀă hnê mơjiâng tuăn ngôa rơkê, pơhlêh ngiât, hngêi trăng troăng klông ton xŏn, cheăng kâ krúa lĕm kong prâi ƀă cheăng kâ têa kơxĭ ngiât.

Péa pâ vêh mơnhên tơhrâ mơdêk ƀă kring vế hnoăng kuăn mơngế. Péa pâ tối rơdêi ki kal ƀă ki tơƀrê dêi troăng hơlâ hên troăng ƀă tơdroăng pơkuâ dêi lâp plâi tơnêi tiô luât pơkâ. Pôa António Costa, Kăn xiâm hnê ngăn Hô̆i đong Châu Âu ƀă jâ Ursula von der Leyen, Kăn xiâm hnê ngăn Vi ƀan Châu Âu khĕn kơdeăn hnoăng cheăng mơjiâng dêi Việt Nam tung ASEAN. Kăn pơkuâ péa pâ tối púi vâ Hneăng hôp khu râ kăn xiâm leh tơbâ 50 hơnăm mơjiâng tơrŭm cheăng ASEAN – EU a hơnăm 2027.