Kố cho roh apoăng môi hdrê loăng plâi kâ châ pêi pro adrêng, tiô kơ tơdroăng rak vế krúa tơniăn kế kâ lâp plâi tơnêi, tug mê, ai tá tâi tâng ing mơdâ pêt, rak ngăn, krí xo, pơto djâ, chôu ‘măn, tâ tung kơhôp, tơdrong vâ mơ’no tê troh a kong têa vâi ê.

Tiô pôa Lê Anh Trung - Kăn hnê ngăn Khu mơdró plâi sầu riêng Dak Lak tối ăm ngin ‘nâi, tơdroăng pơkâ ki rak krúa tơniăn kế kâ hiăng châ mơ’no roh kố mê cho tơtro khât ƀă tơdroăng ki mơ’no tê plâi sầu riêng dêi Việt Nam ƀă tơdroăng pơkâ thế ing pêa ki vâ rôe.

“Tơdroăng pơkâ kố tung mê ai tá hnoăng pêi chiâk pêi deăng plâi sầu riêng, ing tơdroăng ki mơdâ pêt, rôe xo, tâ tung tơdrong, ta troh a tơdroăng pơto, mơ’no tê ăm kong têa vâi ê. Drêng pêi pro tŭm têk mâu tơdroăng mê, khu mơdró kâ ƀă mơngế kuăn pơlê vâ chiâng pêi pro tŭm têk mâu tơdroăng ki vâ châ tê mơ’no dêi tơmeăm troh a kong têa ê. Kố cho ki xiâm dêi luât ki kal, gum ăm kơvâ tơmeăm kố ôh tá tro kreăng xua ing mâu túa kih thuât, ki lơ ai tung la ngiâ kố ah”.

Séa mơnhên ngăn ki pơkâ nếo dêi Khu xiâm ngăn ‘na Chiâk deă Hyôh kong prâi, pôa Vũ Ngọc Huy-Phŏ Kăn xiâm hnê ngăn Kŏng ti Tơlo liăn cheăng Tê mơdró ƀă kong têa ê Dũng Thái Sơn- tối ăm ngin ‘nâi, hên khu mơdró kâ hdrối mê hía nah ối trâm pá xua ôh tá hâi ai troăng hơlâ hnê tơdjâ. La nôkố, tơdroăng pơkâ ki nếo hiăng mơjiâng troăng prôk tro tiô luât ki tơleăng, mơnhên, gum tơrŭm môi tuăn pêi pro ing râ cheăm bêng troh a khu mơdró kâ:

“Tơdroăng ki pơkâ thế khu mơdró ku kŭn rôe plâi sầu riêng tung kơdrum deăng athế chêh inâi pâ phep a cheăm, bêng lơ ai túa cheăng ki mơnhên tro tiô luât i hleăng kô gum ăm tơdroăng ki pơkuâ ngăn krá khât dêi tơnêi têa, ga chía châ tơ’lêi hlâu tâ, athế pêi pro tiô mâu tơdroăng pơkâ thế dêi cheăm, bêng. Mê cho mâu hnoăng pêi pro ki lĕm tro vâ kơvâ cheăng ki kố tơrŭm, tê mơdró krá tơniăn khât”.

Pêa kơ koan ki pơkuâ ngăn cheăng ki tơdjâk, pôa Nguyễn Minh Huấn, Kăn ngăn ‘na Chiâk deăng ƀă Hyôh kong prâi kong pơlê Dak Lak tối ăm ngin ‘nâi, kơvâ chiâk deăng vêh mơnhên Tơdroăng Pơkâ 3015 dêi Khu xiâm ngăn ‘na Chiâk deăng ƀă Hyôh kong prâi cho luât ki pơkuâ mơnhên ki kal vâ thăm mơdêk ivá cheăng, châ mơnhên ‘na kế tơmeăm, plâi kâ ing tíu ki pêt mơjiâng. Khu hnê ngăn kố dế kơhnâ khât tung tơrŭm cheăng ƀă mâu pơlê cheăm, khu mơdró kâ ƀă khu tơrŭm cheăng tơkŭm hnê tối, hnê mơhno ăm kuăn pơlê, mâu khu mơdró ‘na mâu troăng pơkâ ki nếo, tơdrêng amê, hnối pơkâ thế mâu kong cheăm, bêng rak vế-pêi pro tro kơtăng khât ‘na ki séa mơnhên ngăn vâ rak krúa tơniăn plâi kâ, mơnhên xiâm kối dêi plâi ki pêt mơjiâng tíu lâi, tơniăn tơdroăng ki vâ pro mơnhên ƀă tí tăng troăng mơdât xía vâ ki lơ ai tung la ngiâ. Pôa Nguyễn Minh Huấn ai tối ăm ngin ‘nâi tiah kố:

“Khu ngăn ‘na Chiâk deăng ƀă Hyôh kong prâi tơrŭm ƀă Khu xiâm ngăn ‘na pêi pêt, Khu ngăn ‘na Hdrê pêt ƀă Vi ƀan hnê ngăn mâu cheăm, bêng thăm gum ăm kuăn pơlê tung pơkuâ ngăn ƀă rak tơniăn khu plâi kâ; hnê tối kuăn pơlê túa mơdâ pêt, rak ngăn plâi sầu riêng tro tiô tơdroăng pơkâ, túa cheăng ki tơtro ƀă hyôh kong prâi; thăm mơdêk hnoăng cheăng lăm séa mơnhên ngăn, rak tơniăn ăm ki krúa dâi lĕm plâi kâ ƀă mah kơxô̆ kơpong chiâk deăng ki pêt, tíu ki tâ ‘măn plâi sầu riêng tung tơdrong, kơhôp, kơxâk vâ hbrâ ăm tơdroăng mơ’no tê tơngi kong têa vâi ê”.

Tơdroăng ki Khu xiâm ngăn ‘na Chiâk deăng ƀă Hyôh kong prâi pơkâ mơ’no mâu hlá mơ-éa ki séa mơnhên ngăn vâ rak tơniăn ăm plâi sầu riêng, ôh ta xê to vâ rĕng teăm pêi pro ahdrối ing pơkal thế, châ ai ing mâu kơchơ kong têa ê, mê ối cho hvêa chêng prôk ki vâ mơhno mơnhên troăng hơlâ mơdêk kế tơmeăm pêi lo ing chiâk deăng dêi mơngế Việt Nam ai luât pơkâ i nhên. Ki vâ môi tuăn tơdrăng krá khât ing khu râ kơvâ tê mơdró plâi kâ kố, khu ki tơrŭm tê mơdró ƀă mâu cheăm bêng ăm hlo, kơvâ pêi pêt - tê mơdró plâi sầu riêng Việt Nam dế chôa ‘lâng po môi troăng hơlâ ki mơnhông tơdrăng khât, krá tơniăn ƀă tơtro khât tâ.