VOV4.Sêdang - Drêng pôa Phạm Minh Chính châ Kuô̆k hô̆i hneăng má 15 pôk pro Ngế pro xiâm hnê ngăn Chin phuh tơnêi têa Kŏng hòa xah hô̆i chuh ngiah Việt Nam, pôa Samdech Techo Hun Sen, Ngế pro xiâm hnê ngăn kong têa Kul hiăng pơtroh kơthô rơkâu. Tung kơthô, pôa Hun Sen, Ngế pro xiâm hnê ngăn kong têa mơnhên: tơdroăng ki poâ Phạm Minh Chính pơtối châ Kuô̆k hô̆i Việt Nam hneăng má 15 pôk pro Ngế pro xiâm hnê ngăn Chin phuh tơnêi têa Kŏng hòa xah hô̆i chuh ngiah Việt Nam hneăng hơnăm  2021 – 2026 mơhno tối tơdroăng ki loi tơngah dêi Đảng, Tơnêi têa ƀă kuăn pơlê Việt Nam ƀă tơdroăng ki pleăng dêi hnoăng dêi Ngế pro xiâm hnê ngăn tơnêi têa xua môi tơnêi têa Việt Nam kro mơdrŏng, rơkê plĕng xua tơdroăng pơkuâ rơkê dêi Đảng Kŏng san Việt Nam.

Pôa Hun Sen tối, phiu ro ‘na tơdroăng mơnhông tơrŭm cheăng pơla péa tơnêi têa tung pơla hdrối kố nah tiô hiâm mơno cho mâu kong têa ki achê tơniăn lĕm, tơrŭm, hlê plĕng dêi rơpó ƀă péa pâ rơtế ai pơxúa, mơnhên rơhêng vâ tơrŭm krá tơniăn ƀă pôa Phạm Minh Chính, Ngế pro xiâm hnê ngăn tơnêi têa tung la ngiâ.