VOV4.Sêdang - Kơxo lơ 16/8 a Hà Nội, Khu pêi cheăng Vi ƀan Măt trâ̆n Tơnêi têa Việt Nam tơkŭm Hneăng hôp mơ’no tung um tiô troăng măng internet lâp tơnêi têa pêi pro Tơdroăng pêi dêi Măt trâ̆n Tơnêi têa Việt Nam ƀă mâu khu tơrŭm cheăng pêi pro Pơkâ Hneăng hôp Đảng lâp tơnêi têa roh má XII. Troh veăng hôp ƀă xông tơpui hnê mơhno a hneăng hôp, pôa Nguyễn Phú Trọng tối nhên, vâ pêi pro ăm châ tơbrê troăng pêi la ngiâ, hnoăng cheăng, pơkâ xiâm dêi Pơkâ Hneăng hôp Đảng lâp tơnêi têa roh má XIII, ôh tá ai troăng ki lâi ki ê mê cho pin thế mơnhông ivá ó rơdêi tơrŭm môi tuăn dêi tâi tâng hdroâng mơngế tơrŭm ƀă ivá rơxông nôkố ing pơkuâ hnê mơhno tơtro, rơkê dêi Đảng.

Pôa Nguyễn Phú Trọng, Kăn xiâm pơkuâ hnê ngăn Đảng xông tơpui hnê mơhno a hneăng hôp

Pôa Nguyễn Phú Trọng pơkâ thế Măt Trâ̆n Tơnêi têa Việt Nam ƀă mâu khu tơrŭm cheăng kal pơtối thăm mơjiâng ƀă pro krá kâk tơniăn tơdroăng tơrŭm môi tuăn tâi tâng hdroâng mơngế, mơnhông hiâm mơno tuăn tơmiât pêi rơkê dêi mâu râ kuăn pơlê; ki rơhêng vâ tối, mơnhông ivá ó rơdêi kân kĭn dêi mâu râ kuăn pơlê. Rơtế amê cho tơmâng troh tơdroăng pói vâ ƀă pơxúa păng ‘nâng dêi rêm râ kuăn pơlê.