VOV4.Sêdang - Hâi lơ 17/8, pôa Nguyễn Phú Trọng, Kăn xiâm pơkuâ hnê ngăn Đảng hiăng krếo phôn kơ pôa Nguyễn Văn Nên, Kăn pơkuâ hnê ngăn cheăng Đảng Pơlê kong kân Hồ Chí Minh vâ tơpui tơno ‘na tơdroăng hbrâ mơdât pơreăng COVID 19. Mơhé tá hâi mot tơdrêng a pơlê kong kân, laga mâu hâi hiăng hluâ, krê pôa Nguyễn Phú Trọng hơlêm hiâm mơno, tơmâng ‘na pơreăng xông tâ tú a Pơlê kong kân Hồ Chí Minh xuân môi tiah mâu kong pơlê peăng Hdroh tơnêi têa kơtăng rêm hâi.

Pôa Nguyễn Phú Trọng pơtroh rơkong kơ-êng, mơhnhôk troh Đảng ƀô̆, khu râ kăn pơkuâ ƀă kuăn pơlê dêi Pơlê kong kân Hồ Chí Minh hiăng mơ-eăm hbrâ mơdât COVID 19 tung lối péa khế hiăng hluâ, ôh tá xâu pleăng hnoăng cheăng mơhé pá puât, vâ hbrâ veăng tung tơdroăng tơplâ, rak vế châ chăn kuăn pơlê, tơdrêng amê, pơtroh rơkong mơnê troh kuăn pơlê, mơngế rơkê, mâu khu tê mơdró, mâu ngế ki tŏng kum mơngế pá puât ƀă hía hé hiăng ƀă dế tŏng kum ivá rơtế Đảng ƀô̆, khu râ kăn pơkuâ, kuăn pơlê kong kơdrâm tơdjuôm ivá hbrâ mơdât pơreăng.

Klêi kơ’nâi roh tơpui tơno, pôa Nguyễn Phú Trọng môi xôh nếo vêh tối Pơlê kong kân Hồ Chí Minh thế mơ-eăm hên tâ mê nếo, hiăng rŭm môi mê thế thăm rŭm môi tuăn hên tâ, hiăng mơ-eăm thế mơ-eăm hên tâ.

A Sa Ly tơplôu ƀă tơbleăng