VOV4.Sêdang - Pôa Nguyễn Phú Trọng, Kăn xiâm pơkuâ hnê ngăn Đảng tơbleăng tơkong krếo thế  pơtroh kuăn pơlê, mâu lêng tung lâp tơnê têa ƀă kuăn pơlê pin ki rêh ối  pêi cheăng a kong têa ê ‘na tơveăng tơplâ mơdât pơreăng kân COVID-19. Tung kơthô, Kăn xiâm hnê ngăn Đảng tối nhên: ‘’Nôkố, pơreăng COVID-19 xuân dế tâ tú rơ-iô, tâ tú rĕng, pro ‘mêi troh ivá dêi kuăn pơlê, tơdjâk kân ó troh cheăng kâ rêh ối ƀă tơdroăng rêh ối dêi kuăn pơlê.

Ƀă tơdroăng “plâ mơdât pơreăng môi tiah plâ xâ’’, rak vế ivá châ chăn kuăn pơlê cho ki má môi, teăng mâ Đảng ƀă Tơnêi têa, a krếo thế Đảng, ƀă tâi tâng kuăn pơlê  pin ki rêh ối a kong têa ê: Pin hiăng mơ-eăm tâ nếo; hiăng môi tuăn dêi rơpó thăm rế tơrŭm môi tuăn tâ nếo;  hiăng mơ-eăm tâ nếo thăm mơ-eăm tâ nếo; tâi tâng hdroâng mơngế, môi tuăn ƀă Đảng, Chin phuh, rêm râ, mâu kơvâ cheăng tăng troăng mơ-eăm mơdât, tah khŏm châ, ôh tá ăm pơreăng châ tâ tú tung kuăn pơlê.

Pâ thế rêm râ Đảng, khu kăn pơkuâ, khu hnê mơhno hbrâ mơdât pơreăng COVID-19 ing xiâm tơnêi têa troh mâu pơlê cheăm thế mơ-eăm tâ mê nếo tung tơdroăng pơkuâ hnê mơhno; tơkŭm má môi ivá, hâi khế, kum tŭm tơdroăng mơngế, hbrâ ví ƀă pơreăng tâ tú; rơkê tung tơrŭm tơkŭm pêi cheăng vâ châ pêi tơ-ƀrê tơdroăng ki kal mê.

A Loi khât tiah kố, lâp tơnêi têa veăng ‘no ivá, tâi tâng Đảng, tâi tâng kuăn pơlê môi tuăn  môi mơno ƀă pêi pro, rơtế veăng kum ing mâu kuăn pơlê pin ki rêh ối a kong têa ê ƀă vâi pú tung lâp plâi tơnêi, mê pin kô kâi mơdât pơreăng COVID-19 thế ƀlêi trâng, veăng ‘no hnoăng tơxâng a tơdroăng mơ-eăm tơchoâm dêi tâi tâng kuăn mơngế xua môi plâi tơnêi tơniăn, hơniâp lĕm, tơrŭm ƀă hơniâp ro, tơxâng ƀă tơdroăng hmâ pêi ki tơ-ƀrê khên tơnôu dêi Tơnêi têa pin, hdoâng mơngế pin.

Gương tơplôu ƀă tơbleăng