VOV4.Sêdang - Kơxê lơ 13/8, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng tơdah Kăn teăng mâ pôu râng tâi tâng hnoăng kong têa Rusi, cho pôa Bezdetko Gennady Stepanovich, klăng roh pơxiâm hneăng pêi cheăng a Việt Nam. Péa tơnêi têa xuân ai troăng tơmiât tơdjuôm tung mâu tơdroăng lâp plâi tơnêi, tơrŭm krá tơniăn ƀă môi tuăn dêi pó a mâu hneăng hôp tơpui tơno pơla mâu kong têa lâp plâi tơnêi ƀă kơpong.

Pôa Nguyễn Phú Trọng, Kăn xiâm pơkuâ hnê ngăn Đảng tơdah Kăn teăng mâ pơkuâ tâi tâng hnoăng kong têa Rusi 

Tơrŭm cheăng pơla Đảng Kŏng san Việt Nam ƀă mâu Đảng xiâm dêi kong têa Rusi ai hên troăng mơnhông mơdêk nếo, kum kal khât tung tơdroăng thăm mơnhông tơrŭm cheăng pơla péa tơnêi têa. Pôa Nguyễn Phú Trọng mơnhên, Đảng, Tơnêi têa ƀă kuăn pơlê Việt Nam đi đo nhuô̆m tơdroăng tŏng kum tá hiâm mơno ki kong têa Rusi hdrối nah ƀă kong têa Rusi nôkố hiăng ăm Việt Nam, hdrối mơ’nui xuân môi tiah, môi tơdroăng nhuô̆m, thăm tơrŭm cheăng pơla péa tơnêi têa.

Pôa Nguyễn Phú Trọng loi tơngah, Kăn teăng mâ Rusi, ƀă hên hơnăm hiăng ‘nâi plĕng hên tung tơdroăng pêi cheăng ƀă rŭm ƀă Việt Nam, kô pơtối ai mâu tơdroăng veăng kum hên ƀă châ tơƀrê tâ mê nếo ăm tơrŭm cheăng pơla Việt Nam – kong têa Rusi nhŏng o tung la ngiâ.

A Sa Ly tơplôu [ă tơbleăng