VOV4.Sêdang - Kơxo lơ 16/8, Khu xiâm pơkuâ Vi ƀan Măt trâ̆n Tơnêi têa Việt Nam tơkŭm po hneăng hôp mơ’no tơdrêng tung um tiô troăng măng internet lâp tơnêi têa pêi pro Tơdroăng pêi cheăng dêi Măt trâ̆n Tơnêi têa Việt Nam pêi pro Pơkâ Hneăng hôp Đảng lâp tơnêi têa roh má 13. Pôa Nguyễn Phú Trọng troh veăng hôp ƀă xông tơpui hnê mơhno hneăng hôp. Hneăng hôp tơkŭm tơpui tơno vâ pơtối tơ’nôm, pêi kêi đeăng tơdroăng pêi pro, châ tơƀrê má môi Pơkâ hneăng hôp Đảng lâp tơnêi têa roh má 13 tơxâng tơdroăng pói vâ dêi kăn ƀô̆, đảng viên ƀă kuăn pơlê.

Pôu râng hnoăng cheăng dêi Măt trâ̆n Tơnêi têa Việt Nam ƀă mâu khu tơrŭm cheăng, mê cho: pơtối mơjiâng khu rŭm môi tuăn tâi tâng hdroâng mơngế, pêi pro kuăn pơlê pơkuâ dêi hnoăng cheăng, thăm môi tuăn pơlê pơla; pơtâng tối, mơhnhôk thế kuăn pơlê pêi pro tiô troăng hơlâ dêi Đảng, troăng hơlâ luât dêi tơnêi têa; veăng mơjiâng Đảng, Tơnêi têa rế hía rế krúa lĕm, ó rơdêi.

A Sa Ly tơplôu ƀă tơbleăng