VOV4.Sêdang - Hâi lơ 11/8 a tíu pêi cheăng Chin phuh, po hneăng hôp mơ’no tơdrêng tung um tiô troăng hyôh internet lâp tơnêi têa rôh apoăng dêi Chin phuh hneăng hơnăm 2021-2026 tơbleăng Pơkâ hneăng hôp Đảng lâp tơnêi têa rôh má 13 ƀă pơkâ dêi Kuô̆k hô̆i hneăng 15 ‘na mơnhông cheăng kâ rêh ối 5 hơnăm pơla 2021-2025.

Pôa Nguyễn Phú Trọng, Kăn xiâm pơkuâ hnê ngăn Đảng veăng hôp tung lâp tơnêi têa rôh apoăng dêi Chin phuh hneăng 2021-2026

 Pôa Nguyễn Phú Trọng, Kăn xiam pơkuâ hnê ngăn Đảng tối nhên, Hneăng hôp tung lâp tơnêi têa roh má 13 dêi Đảng hiăng klêi tơniăn, môi tuăn ‘na troăng rơhlâ mơjiâng, mơnhông mơdêk ƀă kring vế tơnêi têa, tung mê ai troăng rơhlâ mơnhông cheăng kâ-rêh ối 10 hơnăm 2021-2030, hnoăng cheăng pêi pro troh hơnăm 2045, mơnhông tơnêi têa chiâng tơnêi têa ki mơnhông tơ-ƀrê pêi lo liăn hên ƀă troăng rơhlâ, hnoăng cheăng pêi mơnhông cheăng kâ - rêh ối 5 hơnăm 2021 - 2025.

Vâ pêi tơ-ƀrê mâu pơkâ, tơdroăng cheăng hiăng pơcháu, pôa Nguyễn Phú Trọng thế Chin phuh hneăng 2021-2026 kal pơtối rak vế pêi rơdêi tâ nếo, tro tâ nếo tơdroăng hmâ pêi ki lĕm, mâu tơdroăng pêi tơ-ƀrê, hnoăng cheăng ki kân ƀă mâu ƀai hriâm túa pêi cheăng ki kơnía dêi Chin phuh ing mâu rơxông ki hiăng châ pêi pro; mơ-eăm tâ nếo tung pơla mơnhông hơ’lêh nếo, mơdêk ki tơ-ƀrê, xêt, ai pơxúa tung mâu tơdroăng pêi pro pơla mâu hơnăm mơnhông tơ-ƀrê nếo.

Gương tơplôu ƀă tơbleăng