VOV4.Sêdang - Kơxê lơ 30/7, pôa Nguyễn Xuân Phúc, Kăn xiâm hnê ngăn tơnêi têa lăm pôu ƀă pêi cheăng a kong pơlê Bình Dương ‘na tơdroăng hbrâ mơdât COVID 19. Kăn xiâm hnê ngăn tơnêi têa tối ăm ‘nâi, Bình Dương cho kong pơlê ai hnoăng kal tung tơdroăng pơtroh tơmeăm khoăng dêi tơdroăng cheăng kâ Việt Nam, cho kong pơlê ai kơdrâm kuăn pơlê rêh ối, hên khu tê mơdró, hngêi kơmăi, xĭ nghiê̆p, cho tíu tê mơdró dêi peăng mâ hâi lo pá hdroh tơnêi têa ƀă Pơlê kong kân Hồ Chí Minh, xua mê tơdroăng hbrâ mơdât pơreăng trâm hên pá puât.

Klêi mê tối Bình Dương xuân ối cho tíu ki kơnía, Kăn xiâm hnê ngăn tơnêi têa pơkâ kong pơlê kal pêi pro kơtăng mâu troăng hbrâ mơdât pơreăng, ki má lối cho mâu kơ koan, tíu cheăng tá hâi pêi pro kơtăng Pơkâ 15, 16 dêi Ngế pro xiâm hnê ngăn Chin phuh, ing mê kơdroh mơngế tro tâ pơreăng ƀă ôh tá chiâng pro lối hâ ho a mâu hngêi pơkeăng. Kăn xiâm hnê ngăn tơnêi têa pơchân tối, drêng pêi pro kâng kơxái ôh tá ăm mot lo ƀă klâ kơtăn pơlê pơla, kong pơlê ôh tá ăm kuăn pơlê kơklêa, châi tamo, lơ ôh tá ai ngế rak ngăn; mơhnhôk mâu khu râ ing tơnêi têa, kong pơlê ƀă mâu ngế ai tuăn hơ-ui kum vâ tơdjuôm ivá tŏng kum mâu kơpong pá puât.

A Sa Ly tơplôu ƀă tơbleăng