VOV4.Sêdang - Tiô rơkong krếo thế dêi pôa Miguel Díaz –Canel, Kăn xiâm pơkuâ hnê ngăn cheăng Đảng má môi Khu xiâm pơkuâ Đảng Kŏng san Cuba, Kăn xiâm hnê ngăn kong têa Kŏng hoa Cuba, mê kơxo lơ 18/9, tiô chôu Việt Nam, pôa Nguyễn Xuân Phúc, Kăn cheăng tung Khu xiâm kal kí, Kăn xiâm hnê ngăn tơnêi têa pơkuâ xiâm khu râ kăn hiăng lo lăm pôu pêi cheăng kong têa Cuba sap ing hâi lơ 18 troh 21/9.

Pôa Nguyễn Xuân Phúc, Kăn xiâm hnê ngăn tơnêi têa lăm pôu pêi cheăng  a kong têa Cuba 

Tơdah pôa Nguyễn Xuân Phúc tung roh lăm pôu pêi cheăng pôa Phan Đình Trạc, Kăn cheăng tung Khu xiâm kal kí, Kăn xiâm pơkuâ hnê ngăn cheăng Đảng, Kăn pơkuâ tơdroăng kal kí Tơnêi têa; pôa Bùi Thanh Sơn, Kăn cheăng tung Tíu xiâm Đảng, Ngế xiâm tơpui kâ rơtế khu râ kăn pơkuâ mâu khu, khu xiâm, kơvâ cheăng tơnêi têa. Kố cho roh lăm pôu pêi cheăng xua pôa Nguyễn Xuân Phúc cho kăn xiâm tơnêi têa apoăng lăm pôu pêi cheăng Cuba klêi kơ’nâi kong têa Cuba tơkŭm châ tơƀrê Hneăng hôp Đảng roh má VIII ƀă Việt Nam xuân hiăng tơkŭm po châ tơƀrê Hneăng hôp Đảng lâp tơnêi têa roh má XIII.

Roh lăm pôu pêi cheăng mơhno tơdroăng rŭm môi tuăn, tơdroăng ki tŏng kum krá tơniăn dêi Việt Nam ƀă Cuba. Klêi kơ’nâi roh lăm pôu pêi cheăng kô pro trâu hơngế tơrŭm cheăng péa tơnêi têa, thăm tơrŭm cheăng tung rêm kơvâ cheăng thăm châ tơƀrê tâ.

A Sa Ly tơplôu ƀă tơbleăng