VOV4.Sêdang - Pôa Nguyễn Xuân Phúc, kăn xiâm hnê ngăn tơnêi têa prếi kơdrâi pôa cho jâ Trần Nguyệt Thu ƀă Khu râ kăn xiâm Đảng, Tơnêi têa Việt Nam hiăng vêh troh a tơraih tơƀai lâp plâi tơnêi Nội Bài, pơlê kong xiâm Hà Nội, mơgêi tơniăn lĕm rôh lămpôu tơrŭm tơroâ păng ‘nâng Kŏng hòa Yân chuh Nhân yân Lếo. Kố cho rôh lăm pôu kong têa ê ki apoăng dêi kăn pơkuâ Đảng, Tơnêi têa pin klêi kơ’nâi Hneăng hôp Đảng 13; tơdrêng amê hnối cho rôh lăm pôu pêi cheăng kong têa ê ki apoăng dêi pôa Nguyễn Xuân Phúc tung hnoăng cheăng cho kăn xiâm hnê ngăn tơnêi têa.

Tung pơla 2 hâi sap ing lơ 9 – 10/8, pôa Nguyễn Xuân Phúc hiăng ai lối 10 tơdroăng cheăng tơpui tơno, trâm mâ khu râ kăn xiâm. Mâu kăn cheăng tung Khu xiân hiăng ai 15 tơdroăng cheăng trâm mâ, tơpui tơno ƀă mâu khu râ, kơvâ cheăng, kong pơlê dêi Lếo. Tung rôh lăm pôu, hiăng ai 14 to hlá mơ-éa tơrŭm cheăng châ kĭ tơkêa, tơpui tơno pơla mâu khu xiâm, kơvâ cheăng, khu mơdró kâ ƀă kong pơlê péa tơnêi têa.

Mâu tơdroăng kố ăm hlo, rôh lăm pôu kố hiăng pêi pro châ mâu tơdroăng ki ai pơxúa kal khât, vê hdró tơdroăng ki nếo tung tơdroăng ki veăng tơbêng tơrŭm cheăng kân, malối cho tơrŭm cheăng tung tâi tâng Việt Nam – Lếo.

Katarina Nga tơplôu ƀă tơbleăng