VOV4.Sêdang - Tung roh lăm pôu pêi cheăng a kong têa Lếo, kơhâi dế lơ 10/8, a pơlê kong xiâm Viêng Chăn, pôa Nguyễn Xuân Phúc, Kăn xiâm hnê ngăn tơnêi têa hiăng tơdah jâ Pany Yathotou, Kăn xiâm phŏ hnê ngăn tơnêi têa Lếo ƀă pôa Bounthong Chitmany, Kăn xiâm phŏ hnê ngăn kong têa Lếo. A roh tơdah, pôa Nguyễn Xuân Phúc tối nhên Đảng, Tơnêi têa ƀă kuăn pơlê Việt Nam đi đo nhuô̆m ƀă kơjo má môi ăm tơdroăng thăm tơrŭm cheăng tiô khôi vâi krâ nah, rŭm môi tuăn phá tơ-ê ƀă tơrŭm tŭm túa cheăng Việt Nam – Lếo. 

Kăn xiâm hnê ngăn tơnêi têa pơkâ thế péa pâ pơtối tơrŭm pêi pro châ tơƀrê mâu tơdroăng môi tuăn khu râ kăn xiâm hiăng châ kĭ tơkêa; thăm tơrŭm tung tâi tâng kơvâ cheăng, pro tơ’lêi hlâu ăm mâu tơdroăng tơkêa bro tơrŭm cheăng ki kal pêi pro, rơtế amê cho tŏng kum dêi pó, ki má lối cho mâu kong pơlê tơkăng kong péa tơnêi têa, vâ hbrâ mơdât pơreăng ƀă mơnhông mơdêk cheăng kâ – rêh ối pơlê pơla; thăm pơtâng tối, hnê hriâm ‘na khôi tuá vâi krâ nah rŭm môi tuăn ki phá tơ-ê Việt Nam – Lếo, ki má lối cho ăm rơxông hơnăm ối nếo.

A Sa Ly tơplôu ƀă tơbleăng