VOV4.Sêdang - Kơxê hâi lơ 12/8, a tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa hiăng tơdah pôa Kamal Malhotra, Ngế hnê mơhno cheăng Khu lâp kong têa a Việt Nam, troh koh pơlâng ahdrối mơgêi hneăng pêi cheăng. Kăn xiâm hnê ngăn tơnêi têa rơkâu pôa Kamal Malhotra hiăng kêi đeăng tơtro hneăng pêi cheăng a Việt Nam. Kăn xiâm hnê ngăn tơnêi têa mơnhên Việt Nam nhuô̆m tơdroăng tŏng kum, rơtế ƀă tơrŭm kơnía dêi Khu lâp kong têa ƀă Việt Nam tung plâ pŭn chât hơnăm hiăng hluâ ƀă phiu ro hlo tơdroăng tơrŭm cheăng pơla péa pâ thăm rế hiá rế mơnhông mơdêk trâu hơhngế. Pôa Nguyễn Xuân Phúc pơkâ thế tung la ngiâ Khu lâp kong têa pơtối ai mâu tơdroăng hnê mơhno ‘na troăng hơlâ teăm tơdrêng, tŏng kum liăn ƀă kih thuât ăm Việt Nam, tung mê kơjo tŏng kum Việt Nam pơhlêh tuá pêi tơtêk tiô troăng xúa tơtro má môi roh tơ’lêi hlâu dêi roh Kăch măng kơmăi kơmok 4.0, krá tơniăn tâ, tŭm têk tâ, ôh tá lôi kơbố parŏng, tơtro ƀă troăng pêi mơnhông mơdêk lâp plâi tơnêi, la ngiâ peie pro tơdroăng pói vâ ‘na mơnhông mơdêk tơnêi têa ki Hneăng hôp Đảng XIII hiăng pơkâ mơ’no.

A Sa Ly tơplôu ƀă tơbleăng