VOV4.Sêdang -Tung rôh lăm pôu pêi cheăng kong têa Lếo, kơxo lơ 10/8, pôa Nguyễn Xuân Phúc, Kăn xiâm hnê ngăn tơnêi têa hiăng ai ƀai pơchuât tơdroăng ki kal a Kuô̆k hô̆i Lếo, dế hôp roh má môi Kuô̆k hô̆i hneăng 9. Kăn xiâm hnê ngăn tơnêi têa tối hâk tơngăm châ veăng hôp drêng cho môi ngế ing tơnêi têa ê dêi lâp plâi tơnêi ki apoăng châ tơbleăng tung rôh hôp a Hngêi hôp kân nếo krip a ngiâ Kuô̆k hô̆i hneăng 9 tơnêi têa Kŏng hoa Yân chuh Nhân yân Lếo. ƀai pơchuât dêi pôa Nguyễn Xuân Phúc hiăng tối mâu tơdroăng ki tơ-ƀrê tung tơrŭm pơla péa tơnêi têa.

Kăn xiâm hnê ngăn tơnêi têa pin tối tiah kố, tung tơdroăng tơrŭm kal kí, ai hnoăng pêi pro ki kal tung tơrŭm pơla Kuôk hô̆i peá tơnêi têa. Tơdroăng veăng kum dêi Kuô̆k hô̆i péa tơnêi têa kô cho tíu ki vâ tối tro krá tơniăn ăm tơdroăng tơrŭm cheăng châ tơ-ƀrê dêi Chin phuh, Măt trân Tơnêi têa, mâu kong pơlê, mâu khu tơrŭm cheăng pơlê pơla ƀă pơtối mơ-eăm, hriăn plê̆ng ki nếo dêi Khu mơdró, kuăn pơlê péa tơnêi têa.

Mơgêi bai pơchuât, pôa Nguyễn Xuân Phúc tối nhên, péa tơnêi têa rơtế ôu tơchoâm têa kroăng Mekong, rơtế ‘nhuăn dêi rŏng kơdong a hbêa ngo Trường Sơn ki krip tơdrŏm, tơdroăng ki ai xêh ing sap nah troh nôkố, môi tiah rơtế tơrŭm krá péa tơnêi têa, péa hdroâng kuăn ngo. Kăn xiâm hnê ngăn tơnêi têa tối, mê cho tơdroăng tơrŭm lĕm tá ah, rơtế veăng tối ăm dêi rơpó, kum dêi rơpó rơtế xông kro mơnhŏng.

Gương tơplôu ƀă tơbleăng